Уралдаанч Ц. Мягмардорж: Зурхай даваад тайвширсан даа

Сэтгүүлч
2018 оны 9-р сарын 13 -нд

АХ-ын 97 жилийн ой, үндэсний их баяр наадмыг Хөвсгөл аймгаас зорин ирсэн уралдаанч Цэрэндоржийн Мягмардоржтой уулзаж баярын сэтгэгдэл хуваалцлаа. Азаргаа айргийн тавд, соёолонгоо айргийн гуравт хурдлуулж амжилттай наадсан чадварлаг уралдаанч хүүгийн яриаг хүргэе.

-Төрийн наадмаас хоёр айраг хүртсэ чадварлаг уралдаанч хүүд баяр хүргэе. Өөрийгөө танилцуулаач?
-Намайг Цэрэндоржийн Мягмардорж гэдэг. 14 настай. Би Хөвсгөл аймгийн Тариалан сумын дунд сургуульд сурдаг, намар есдүгээр ангид орно.    
-Санасандаа хүртэл  уралдаж чадав уу?
-Өглөө мордоход уяач маань “Сайн яваарай,  эхний 10 дотор эргээд гараагаа алдаж болохгүй шүү” гэсэн. Тэгээд би эхний хэдэд л морио барихыг хичээсэн. Үзүүр дөхөх тусам тав, зургаад багтаад сэтгэл догдолж эхэлсэн. Сүүлд гурван азарга зэрэгцээд ирэхэд “Одоо яана аа, айргаас мултарчих болов уу, яах бол” гэж сандарч явсаар зурхай даваад сэтгэл тайвширсан.
- Уралдааны зам ямар байсан бэ?
- Өчигдрийг бодвол зам гайгүй байсан. Халтирч унах вий гэж айхгүй болохоор морио унахад анхаарал алдахгүй амжилттай уралдлаа.  
- Хурдан морь унаад хэдэн жил болж байна вэ?
-Хурдан морь унаад зургаан жил болж байна. Харин улсын наадамд тав дахь жилдээ морь унаж байна.  
- Таван жил улсын наадамд морь унасан гэхээр туршлагатай уралдаанч байх нь. Өмнө нь айраг, түрүү авч байсан уу?
-Үгүй. Өнөөдөр улсын баяр наадмаас анхны айргаа хүртлээ, гоё санагдаж байна. Улсын наадамд морь айрагдуулна гэдэг том амжилт шүү дээ. 2015 онд хонгор азарга зургаад давхиулсан.  Хээр азаргаа хязаалан үрээ байхад нь наймд хурдлуулсан. Заримыг нь мартчихжээ. Эхний өдөр хязаалан унасан, их морь гуч гаргаад давхиулсан.  
-Ямар, ямар улсын чанартай бүсийн уралдаанд оролцож байсан бэ?
- Багануурт Д.Ганхуяг ахын морийг унаж “Хангарьд” уралдаанд азарга айргийн гуравт, хээр хязаалан айргийн дөрөвт хурдлуулсан.
- Хэн чамд морь унахыг зааж өгсөн бэ?
- Буянаа ах маань надад морь унахыг зааж өгсөн. Манай гэрт уяач хүн байхгүй.Би өөрөө морь унах дуртай, морио унаад давхих гоё байдаг юм.
-Ярилцсанд баярлалаа. Унасан морио үргэлж айраг, түрүүнд давхиулаарай.

Тод магнай сэтгүүл №99


1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.