24 тавиач хүүхэд авч үлджээ


Их насны морьдын уралдааны дараа Хурдан морины салбарын комиссын нарийн бичгийн дарга, хурандаа Ц.Галбадрах мэдээлэл хийлээ. Тэрээр: “Тулгар төрийн 2227,  Их Монгол Улсын 812,  Ардын хувьсгалын 97 жилийн ой, Үндэсний их баяр наадмын хурдан их насны морьдын уралдаанд 384 хүлэг бүртгүүлж, 339 нь гараанаас гарч уралдлаа. Үүлдэрлэг байдлаар найм, сэрвээний өндрөөр хасагдсан морь үгүй. Тавиач гэж наадам үймүүлэх шалтгаантай 24 хүүхэд авч үлдсэн. Гарааны зурхайд мориноосоо унасан хүүхэд байхгүй. Замд янз бүрийн асуудал гараагүй. Хүн эмнэлгээс ямар нэгэн мэдээлэл өгсөнгүй. Тоос шороогүй, хангай дэлхий ивээлээ хайрласан сайхан уралдаан боллоо” гээд сэтгүүлчдийн асуултанд ийн хариуллаа.

-Дөрвөн хүүхэд мориноос унасан гэсэн мэдээлэл байна.

-Тэрийг мэдэхгүй байна. Мориноос унасан байж болзошгүй. Гэхдээ одоогоор эмнэлгийн байгууллагаас ямар нэгэн мэдээлэл өгсөнгүй.  Хүүхдийн байгууллага уралдааныг дагасан. Гарааны зурхайд хүүхэд унаагүй. Эндсэн гурван морины хүүхэд энэ тоонд орсон байж болох юм. Өөрөөр хэлбэл, машинд суулгаад авчирсан болохоор. Үүнийг тодруулж болно” гэлээ.

-Энэ жилийн хурдан морины уралдааны хувьд ямар онцлог ажиглагдаж байна вэ. Тооны хувьд дундаж түвшинд байна уу, эсхүл нэмэгдэж байна уу?

-Их насны морьд олон мордлоо. Өнгөрсөн жил олон морь хассан гэж шүүмжилсэн. Энэ жилийн хувьд бүх насны морьд 70-аас дээш хувьтай мордож байна. Нэгэнт мэргэжлийн байгууллага нь хассан учраас гомдол санал ирсэнгүй. Тэгэхээр мал эмнэлгийн ажилтнууд сайн ажиллаж байна гэсэн бодолтой байна.

-Цаг агаарын байдлаас шалтгаалж уралдааны зайг өөрчилсөн үү?

-Үгүй. Үндэсний их баяр наадмын тухай хуульд их морь 24-26 км гэж заасан байдаг. Үүнийг дундажлаад их насны морьд 25 км-т уралдсан. Маргааш  даага 11 км-ээс уралдана.

У.Энхмаа

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна