Аймгийн Алдарт уяач Д.Ганхуяг: Унаган азаргаа айрагдуулж аавынхаа Тод манлай уяач цолыг мялаалаа

Сэтгүүлч
2018 оны 7-р сарын 11 -нд

Адуун сүргийн манлай азарганы уралдаанд шандас шалгасан 153 хүлгээс 14 настай Цэрэндоржийн Мягмардорж хүүгийн унаж хурдлуулсан Хөвсгөл аймгийн Цагаан-Уул сумын харьяат, аймгийн Алдарт уяач Доржпүрэвийн Ганхуягийн Молор хүрэн  азарга айргийн тавд хурдалж, хоймор нутгийн түмнээ баясгалаа. Улс, бүсийн уралдаанаас хэд хэдэн айраг, түрүү хүртсэн Д.Ганхуяг Алдарт нохой жилийн сар шинийн босгон дээр Тод манлай уяач цол хүртсэн Гордоогийн Доржпүрэвийн хүү гэдгийг морь сонирхогчид мэдэх бизээ.

Аавынхаа Тод манлай уяач цолыг мялааж, төрийнхөө наадамд азарга айргдуулсан танд халуун баяр  хүргэе. Баярынхаа сэтгэгдлээс хуваалцаач?

-Баярлалаа. Үнэхээр сайхан байна. Миний аав Хөвсгөл аймгийн Тариалан сумын харьяат Гордоогийн Доржпүрэв өнөө жил Тод манлай уяач хэмээх эрхэм цолны эзэн болсон. Молор хүрэн азарганы маань  уяа сойлгыг миний аав тааруулдаг.

-Молор хүрэн азарга өмнө нь ямар амжилт үзүүлж байсан бэ?

-Архангай, Булган, Хэнтий аймгуудад болсон уралдаануудад айрагдаж байсан. Төрийнхөө наадамд анх удаа ирж оролцож байна.

-Залуухан азарга бололтой. Хэдтэй вэ?

-Дөнгөж нас нийлж байгаа залуу азарга.

-Унаган тамгатай айргаа төр түмнийхээ их баяр цэнгэлд түрүүлгэсэн танд дахин баяр хүргэж, дараа дараагийнх нь уралдаануудад  амжилт хүсье.

-Баярлалаа. Молор хүрэн маань манай унаган адуу. Цавьдар азарганы маань төл байгаа юм. Ер нь бид унаган адуугаараа нааддаг улс.  

А.Энхжил

1 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.