Сумын Алдарт уяач Нэргүйн Атарбаяр: Хэнтийд долоо түрүүлсэн Гочоогийн хулын удамтай зээрд азарга маань айрагдлаа

Адуун сүргийн манлай азарганы уралдааны айргийн дөрөвт 10 настай Ууганбаатарын Цэрэнбаяр хүүгийн унаж хурдлуулсан Хэнтий аймгийн Баян-Овоо сумын харьяат сумын Алдарт уяач Нэргүйн Атарбаярын зээрд азарга хурдалсан.  Бид түүнээс баярын сэтгэгдэл хуваалцлаа.

-Төрийнхөө их баяр наадамд азарга айрагдуулсан танд баяр хүргэе. Баярынхаа сэтгэгдлээс хуваалцахгүй юу?

-Сэтгэгдэл их өндөр байна. Миний зээрд азарга  шүдлэндээ Хэнтий аймгийн Баян-Овоо сумын наадамд аман хүзүүдээд, хязааландаа Дорнод аймагт түрүүлсэн. Харин өнөө жил Хэнтий аймгийнхаа  хаврын зүүн бүсийн уралдаанд аман үзүүдээд төрийнхөө наадамд ирж, айрагдаж байгаа нь энэ.

-Соёолон азарга уу?

-Тийм. Шинэ соёолон азарга.

-Хурдан хүлгийнхээ удам угшилыг нь танилцуулаач?

-Эцэг нь Хэнтий аймгийн Баян-Овоо сумын харьяат Шарын алаг азарга . Харин эх нь Хэнтий аймагт завсаргүй долоо түрүүлсэн Гочоогийн хул гэдэг азарганы удамтай.

-Хэдий үеэс уягдсан бэ?

-Дааганаасаа эхэлж уягдаад Баян-Овоо сумынхаа наадамд түрүүлж байсан.

-Томоохон наадамд анх удаа уралдаж байгаа юмуу?

-Тиймээ. Том  наадамд анх удаа ирж уралдан, амжилттай сайхан айрагдлаа.

-Та хэдэн насны морьтой ирсэн бэ?

-Ганцхан азаргатайгаа ирээд айрагдууллаа.

-Өнөө жилийн баяр наадмын талаар ямар сэтгэгдэлтэй байна вэ?

-Нар, хур тэгширсэн сайхан наадам болж байна.

-Дараа дараагийн уралдаанд нь амжилт хүсье.

-Баярлалаа. 

А.Энхжил

8 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.