Х.Болорчулууны сартай хүрэн ХЯЗААЛАН ТҮРҮҮ МАГНАЙД хурдаллаа

Тулгар төрийн 2227, Их Монгол Улсын 812, Ардын Хувьсгалын 97 жилийн ойн, Үндэсний Их баяр наадмын хязаалан насны морьд барианд ирж, УИХ-ын гишүүн Х.Болорчулууны хүрэн үрээ түрүүлсэн бол аман хүзүүнд Монгол Улсын Тод манлай уяач Д.Хишигжаргалын зээрд хурдаллаа. 

Айргийн гуравт Увс аймгийн Тэс сумын уяач Ц.Дамдин-Ядамын цоохор, айргийн дөрөвт Говь-Алтай аймгийн Дэлгэр сумын уяач З.Шижирбатын бор халзан, айргийн тавд Төв аймгийн Баян сумын харьяат Б.Нямжавын халтар хязаалан уясан эзэн, унасан хүүхдээ баярлуулан наадамчин олныг баясгалаа.

Харин зургаад Ховд аймгийн Дарви сумын уяач Б.Баярдоржийн хээр, долоод Баянхонгор аймгийн Бууцагаан сумын Улсын Алдарт  уяач Ц.Золбоогийн зээрд, наймд Төв аймгийн Дэлгэрхаан сумын уяач Ш.Мөнгөншагайн цавьдар, есөд Булган аймгийн Сайхан сумын уяач С.Нямжавын сартай хээр, Улаанбаатар хотын Сонгинохайрхан дүүргийн уяач Н.Билгээгийн хүрэн хязаалан тус тус хурдлав.

Энэ насанд 345 үрээ бүртгүүлснээс 236 орчим нь хөх тэнгэртээ тоосоо өргөсөн юм.

Хязаалан насны хүлгүүд 18 км-ын зайнаас уралдлаа.