УЯАЧ Х.ТҮВШИНБОЛД: Хээр морь маань хоёр сумын ойд түрүүлж, аймгийн наадамд аман хүзүүдсэн

Баянхонгор аймгийн Эрдэнэцогт сумын уугуул, дөрөвдүгээр багийн харьяат Хүнбишийн Түвшинболд хэмээх уяачийг уншигч танаа танилцуулж байна. Тэрээр 1972 оны намар Хүрэмтийн голд төрсөн бөгөөд 2014 оны сумын Шилдэг уяач аж.

-Аймгийнхаа баяр наадамд их морь айрагдуулсан юм байна. Энэ нутгийн адуу юу?
-Миний шар хээр морь Эрдэнэцогт сумын унаган адуу. Эцэг нь хонгор азарга, эх нь хээр гүү байдаг. Анх 2012 онд Шалгалжуут тосгоны 60 жилийн ойд хавчиг морь аман хүзүүдээд, 2013 онд Эрдэнэцогт, 2014 онд Өлзийт сумын 90 жилийн ойд тус тус түрүүлсэн.
-Жилдээ нэг л уралддаг юмаа даа?
-Тийм. Хивэг тэжээл өгдөггүй өвсөөр уралддаг учраас жилдээ нэг л уралддаг юм. 2014 онд л Өлзийтийн ой болон сумынхаа наадамд уралдаад хоёуланд нь түрүүлсэн.
-2015 оны тухайд...?
-Сумандаа уралдаагүй шууд аймаг руу явсан. Аймгийн наадамд аман хүзүүдчихээд дараа нь бага наадмуудад түрүүлсэн.
-Хурдан хээрийн эзэн уяачийн эрдэмд шамдаад удаж байна уу?
-2013 оноос. Түүнээс өмнө Шаргалжуутын наадамд айрагдахад нь манай хүүхэд уясан юм. Манайх хүү, охин хоёртой. Хүү маань энэ жил 23 хүрч байна.
-Та бүхний морь уях үйлсэд амжилт хүсье. Ярилцсанд баярлалаа.

"Тод магнай" сэтгүүл. Баянхонгор аймгийн тусгай дугаар. 2016 он