Нэрт уяач Самбуугийн Даш

А.Тэлмэн
2018 оны 4-р сарын 20 -нд

Эрдэнэ сум азарганы хурд оршсон нутаг хэмээн хэлсэн нь санаандгүй унагасан үг биш юм. 1943 оны хонин жилийн наадмаар энэ нутгийн уяач Самбуугийн Дамдингомбын буурал духт хүрэн азарга айргийн гуравт хурдлан хурсан олноо цэнгүүлсэн нь баяр наадмын цуваанаа тэмдэглэгдэн үлджээ.
Энэхүү буурал духт хүрэн азарга бол Самбуугийн адуу бөгөөд тухайн үед том хүү Дамдингомбынхоо нэр дээр цоллуулсан нь энэ юм. Хурдан хүрэн азаргаа улсад айрагдуулсан Самбуу гэгч дөрвөн хүүтэй бөгөөд 1940 оны баяр наадамд хар хээр даага түрүүлгэн отгон хүү Дашийнхаа нэр дээр цоллуулж байжээ.
Төрийн наадмаас нэг түрүү, нэг айраг хүртсэн Самбуу уяачийн дөрвөн хүүгээс хоёр бага нь /Жамсран, Даш/ эцгээ залгамжлан хурдан хүлгийн уяа сойлго тааруулах болжээ. Энэ удаа бид та бүхэнд гурван хүрэн азаргаараа одтой наадагч бага хүү С.Дашийг нь танилцуулж байна.
Эрдэнэ сумын дээхнэ үеийн сайн уяачдын нэг С.Даш 1931 оны дөрөвдүгээр сард одоогийн Баяндэлгэр сумын нутаг Хөндлөн булаг хэмээх газар айлын отгон хүү болон мэндэлжээ. Багад нь ээж нь бурхны орноо одож, аав, ах нарын хамт амьдарч байгаад хожмоо “ээжтэй” болсон гэдэг. 16-17 наснаас эхлэн хурдан морь уясан С.Даш гурван хүрэн азарга, хүрэн халзан, хонгор морьдоороо сум, орон нутгийн наадмаас 30 гаруй айраг, түрүү хүртэн тухайн цаг үеийнхээ “луухгар” уяачдын нэгээр нэрлэгдэж байжээ.
С.Даш нь С.Гэсэрваань, Н.Гочоо, М.Бат-Очир, Б.Цэгмид, “цагаан” Дугар, Б.Александр,Г.Хийл, Г.Даваасүрэн, Г.Өлзийбат, Д.Сайнбилэг, С.Загдгарав, н.Дэжид, П.Жаргалсайхан, Л.Эрдэнэбаатар, О.Цогтсайхан, Б.Самдан зэрэг нутгийн уяачидтай нэг уяанд морьдоо уяж хурдлуулж байсан аж..
Тэрээр 12 хүүхэд өсгөж хүмүүжлэхийн зэрэгцээ нэгдлийн 1000-аад хонь маллаж, гүү барьж, агент хийж, хурдан морьдоо уяж сойн төрийн наадамд айраг, түрүүнд хурдлуулж, түмэн олноо баясгаж нутаг усандаа нэрээ мөнхөлсөн сайхан уяачдын нэг юм.

"Тод магнай" сэтгүүл. Төв аймгийн Баян, Баянжаргалан, Эрдэнэ сумдын тусгай дугаар

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна