М.Энхболд ММСУХ-ны тэргүүнээс өөрийн хүсэлтээр чөлөөлөгджээ

Өчигдөр ММСУХ-ны тэргүүлэгчид бүрэн бүрэлдэхүүнээрээ цуглаж,  цаг үеийн асуудлаар зөвлөлджээ. Тэргүүлэгчдийн ээлжит хурлаар “Дүнжингаравын хурд-2018” хаврын төвийн бүсийн уралдаантай холбоотой асуудлыг авч хэлэлцэн, ММСУХ-ны удирдлага хариуцлага хүлээх нь зүйтэй гэсэн шийдвэрт хүрчээ. Энэ асуудалтай холбогдуулан зарим нэг нь ММСУХ-ны тэргүүлэгчид бүрэн бүрэлдэхүүнээрээ огцрох ёстой гэсэн санал гаргасан ч дэмжигдээгүй байна. Харин М.Энхболд / ММСУХ-ны тэргүүнээс /, П.Сэргэлэн /ММСУХ-ны Ерөнхий нарийн бичгийн даргаас /нарын сайн дураараа чөлөөлөгдөх хүсэлтийг авч хэлэлцэн, Нийслэлийн МСУХ-ны тэргүүн М.Мөнхбаясгаланг  ММСУХ-ны тэргүүнийг түр орлох шийдвэрт хүрчээ. Өөрөөр хэлбэл, М.Энхболд өөрийн хүсэлтээр  ММСУХ-ны тэргүүнээс татгалзаж, уяачдын VII их хурал хүртэл М.Мөнхбаясгалан ММСУХ-г удирдах аж. Түүнчлэн тэргүүлэгчдийн өчигдрийн хурлаас ММСУХ-ны VII их хурлыг ирэх тавдугаар сарын 5-ны дотор багтаан хуралдуулахаар тогтсон байна. Их хуралд бэлтгэх ажлын хэсгийг М.Мөнхбаясгалан ахлах бөгөөд хууль эрх зүйн мэдлэгтэй 10 тэргүүлэгч багтжээ.
У.Энхмаа