ММСЗУХ-ны Ерөнхий нарийн бичгийн дарга Н.Мөнхбаясгалан Алдарт уяач цолоо гардан авлаа

Аргын тооллын гуравдугаар сарын 1 буюу Эх орончдын өдөр, билгийн тооллын шинийн 14-ний билэгт сайн өдөр  Монголын Морин Спорт Залуу Уяачдын Холбооны Ерөнхий нарийн бичгийн дарга Нанзаддоржийн  Мөнхбаясгалан нийслэлийн Алдарт уяач цолоо гардан авлаа. Нэгдүгээр сарын 25-нд болсон Нийслэлийн уяачдын өдрөөр эзгүй байсан тэрээр ийнхүү Эх орончдын өдөр цолоо гардан авч буй юм.
АХ-ын 95 жилийн ой, үндэсний их баяр цэнгэл наадамд сартай зээрд морио айргийн тавд давхиулан хурдан морь сонирхогчдын эчнээ танил болсон тэрээр Завхан аймгийн Цэцэн-Уул сумаар овоглодог  бөгөөд удам дамжсан уяач юм. Өөрөөр хэлбэл, түүний ээжийнх нь аав Норов гэгч Завхан аймгийн Цэцэн-Уул суманд олон түрүүлж, аймагтаа нэлээд хэд айрагдсан хурдан бор морьтой хүн байжээ. Ийнхүү өвөг дээдсийнхээ үйл хэргийг үргэлжлүүлэн морь уях төрийн хэрэгт шамдаж буй тэрээр зээрд морийг нь улсын наадамд унаж айрагдуулсан хүүд хоёр өрөө байр бэлэглэн шуугиан тарьж байсан билээ.
Уралдаанч хүүхдийнхээ хөдөлмөрийг өндрөөр үнэлж, бусдадаа үлгэрлэсэн Н.Мөнхбаясгалан хэдхэн хоногийн өмнө Сэлэнгэ аймгийн Цагааннуур суманд болсон уралдаанд улсад айрагддаг зээрд морио түрүүлгэн цолоо мялаасан гэнэ лээ.
Нийт уншигчдынхаа өмнөөс шинэхэн Алдартдаа баяр хүргэж, төрийн хишигт уяач болохын ерөөл өргөе өө.
У.Энхмаа