16 улсын Алдарт уяач шинээр төрлөө

А.Тэлмэн
2018 оны 2-р сарын 21 -нд

XVII жарны “Тийн унжлагат” хэмээх шар нохой жилийн сар шинийн босгон дээр Монгол Улсын Алдарт уяач цолоор 16 хүн шагнагдсан билээ.  Эдгээрийн  гурав нь Өвөрхангай аймгийн уяачид байсан бөгөөд тодруулбал Арслан хар азаргаа улсад хоёр айрагдуулсан Уянга сумын уугуул Баатарын Даваадорж, 2017 онд гайхалтай сайхан наадсан Хархорин сумын уугуул Занабазарын Батбаяр,  “Барс” группээр овоглодог Баян-Өндөр сумын уугуул Мандахын Мөнхбат нар юм.
Зулай цагаан Алтай нутгаас мөн гурван Алдарт уяач төрсний нэг нь Говь-Алтай аймгийн Баян-Уул сумын уугуул Дагвадоржийн Жамъян.  “Макс” группын захирал ах дүү Тод манлай уяачдын залгамж халаа болсон тэрээр халиун азаргаараа одтой сайхан нааддаг билээ.
Алтай нутгаар овоглодог Алдарт уяачдын  нэг нь соёолон адууны хийморь оршоогч Хөх морьт сумын уугуул Түвдэннямын Ганзориг юм. Баруун бүсийн уралдаануудад байнга амжилттай оролцдог түүнийг булган сүүлтэй байж араасаа олон Алдартыг дагуулна хэмээн Алтай нутгийнхан ихэд бэлгэшээж байгаа гэнэ лээ.
Тус аймгаас төрсөн гурав дахь Алдарт уяач бол Бөөхүүгийн Винтов. Адууныхаа чанар чансааг сайжруулахад эртнээс анхаарч ирсэн тэрээр олон жилийн  хөдөлмөрөө үнэлүүлэн ийн төрийн хишигт уяач боллоо.
 Шинэхэн Алдартуудаас сорчлон онцлох дараагийн эрхэм бол Суман хүрэн мориороо түмэн олондоо танигдсан Булган аймгийн  Хангал сумын уугуул, Орхон аймгийн Баян-Өндөр сумын харьяат Доржийн Баясгалан юм.  Энэ эрхмийн талаар морь сонирхогчид эчнээ мэдэх билээ. 
Шанхай нутгийн эрдэмт мэргэн уяачдын залгамж халаа болсон энэ цагийн шилдэг уяачдын нэг   Өмнөговь аймгийн Цогтцэций сумын харьяат Наранцэцэгийн Амгалан дүүрэн амжилтаар улсын Алдарт цолоо хүртэж, дүү Алдаржаргал нь улсын шилдэг уяачаар шалгаран баяр дээр баяр нэмснийг энд дуулгах нь зүйтэй биз ээ.
Сүүлийн жилүүдэд тогтмол шинэ цолтон төрж буй хонгор нутгийн амжилтын буухиа энэ  жил ч тасарсангүй. Төрийн наадмын хишигт Салхин халтарын эзэн Баянхонгор аймгийн Баянбулаг сумын уугуул Чинбатын Махбал улсын Алдарт уяач хэмээх эрхэм цолны эзэн болж,  хонгор нутгийн түмнийхээ магнайг тэнийлгэсэн байна. Тэрээр өнгөрөгч 2017 оны Баянхонгор аймгийн шилдэг уяачаар шалгарсан билээ. Ингээд шинэхэн цолтнуудаа танилцуулъя.
Монгол Улсын Алдарт уяач цолоор:
1. Говь-Алтай аймгийн Баян-Уул сумын уугуул Дагвадоржийн Жамъян
2. Өвөрхангай аймгийн Хархорин сумын уугуул Занабазарын Батбаяр
3. Өвөрхангай аймгийн Уянга сумын уугуул Баатарын Даваадорж
4. Өмнөговь аймгийн Цогтцэций сумын харъяат Наранцэцэгийн Амгалан
5. Төв аймгийн Баян сумын уугуул Энхболдын Анар
6. Баянхонгор аймгийн Баянбулаг сумын харьяат Чинбатын Махбал
7. Хөвсгөл аймгийн Шинэ-Идэр сумын уугуул Чулуунбатын Цэрэнбат
8. Говь-Алтай аймгийн Хөхморьт сумын харьяат Түвдэннямын Ганзориг
9. Булган аймгийн Могод сумын уугуул уяач Нямсүрэнгийн Базаргарьд
10. Говь-Алтай аймгийн Дэлгэр сумын уугуул Бөөхүүгийн Винтов
11. Орхон аймгийн Баян-Өндөр сумын уугуул Доржийн Баясгалан
12. Сүхбаатар аймгийн Халзан сумын уугуул Жамбын Мөнхсүрэн
13. Дундговь аймгийн Дэлгэрцогт сумын уугуул Лувсандагвын Эрдэнэбаатар
14. Хөвсгөл аймгийн Тариалан сумын уугуул Дондовын Бадрах
15. Өвөрхангай аймгийн Баян-Өндөр сумын уугуул Мандахын Мөнхбат
16. Ховд аймгийн Цэцэг сумын уугуул Начингийн Баасанжав

У.Энхмаа

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна