УЯАЧ Н.НЯМДОРЖ: ХУРДАН МОРЬ УНАЖ ӨССӨН БОЛОХООР АДУУНД ИХ ДУРТАЙ

Говьсүмбэр аймгийн Шивээговь сумын уугуул, уяач Н.Нямдоржийн ярилцлагыг уншигч танаа хүргэж байна.

-Танай удамд уяачид олон байна уу?
-Манай аав Говь-Алтай аймгийн Баян-Уул сумын уугуул хүн. Тэгээд Төв аймагт амьдарч, нутаг орондоо уясан хүлгэд нь дажгүй сайхан давхидаг байлаа. Гэхдээ ааваас илүү манай ах их сайн уясан. 1994 онд Дундговь аймгийн Цагаандэлгэр сумын 70 жилийн ойгоор соёолон морь түрүүлгэж, Говьсүмбэр аймгийн Эрчим хүчний 10 жилийн ойгоор дахин түрүүлгэсэн. 2003 онд нэг компанийн 30 жилийн ойгоор Баянталд азарганд соёолон азарга мордуулж түрүүлүүлсэн. Ах ер нь соёолон нэлээн сайн давхиулдаг байсан. Үүнээс өмнө 2000 онд Шивээговийн наадамд алаг морь нь айрагдаж, миний хар азарганы төл хар шүдлэн үрээ нь түрүүлсэн. Дараа жил нь 2001 онд Шивээговь суманд манайхан долоон айраг, хоёр түрүү авсан. Тэр ондоо сумын Алдар уяач болсон. Харин 2004 онд Даланжаргалан сумын 80 жилийн ойгоор алаг морь айрагдаж, Говьсүмбэр аймгийнхаа наадамд түрүүлсэн.
-Хаанахын угшилтай адуунууд юм?
-Дээд тал нь манай авга ах Баатар гэж хүний адуунаас гаралтай. Аав маань эхээс тавуулаа. Одоо хамгийн бага нь л амьд сэрүүн байна. Авга ах Дорж Дундговь аймгийн Баянжаргалан сумын 60 жилийн ойгоор даага, их морь хоёр түрүүлгэж байсан. Цагаандэлгэрийн 70 жилийн ойд түрүүлсэн соёолонгийн эзэн.
-Харин та бие даан морь уяж байна уу?
-Яг үнэндээ бие дааж уясан юм алга. Хүүхэд байхын морь мал унадаг байсан болохоор адуунд их дуртай. Тэр сонирхолдоо хөтлөгдөөд л явж байгаа хүн.
-Ярилцсанд баярлалаа.

"Тод магнай" сэтгүүл. Говьсүмбэр аймгийн тусгай дугаар. 2015 он