Алдарт уяач Аюушийн Гантулга

А.Тэлмэн
2018 оны 1-р сарын 15 -нд

Шандаст хурдан хүлгүүдийнхээ
Хийморь дор сүсэглэж
Санчигандаа хяруутай өвгөдийнхөө
Сургаал дор ухааждаг
Морин шүтээнтэй монгол эрсийн нэг нь  Баянхонгор аймгийн Жаргалант сумын уугуул, Орхон аймгийн Баян-Өндөр сумын харьяат, аймгийн Алдарт уяач Аюушийн Гантулга юм. Тэрээр 1970 оны төмөр нохой жил эхээс унаж, багаас мал маллах арга ухаанд суралцан хурдан хүлгийн  нуруун дээр гийнгоо аялж явсан гэдэг. Харин морь уяж сойх тухайд 1990-аад оны дунд үеэс эхтэй бөгөөд том ах А.Энхтайваны нөлөө их байсан хэмээдэг. Учир нь түүний ах А.Энхтайван агсан Баянхонгор аймгийн  хурдан морины комисст олон жил ажилласан нэгэн бөгөөд хэний ямар морьд сайн давхиж байгаа талаар байнга хуучилдаг байсан  аж. Ийнхүү ахынхаа нөлөөгөөр морь уях эрдэмд шамдсан тэрээр анхны айргаа  сумын баяр наадмаас хүртэж түүндээ ихэд урамшсан гэдэг. Улмаар 1999 оны Ламын Гэгээн Лувсанданзанжанцаны мэлмий гийсний  360 жилийн ой, баруун бүсийн наадамд  их насны морио 48-д,  хязаалангаа 21-д,  шүдлэнгээ зургаад хурдлуулж байсан юм.
А.Гантулга ах нараа даган 2000 онд Эрдэнэт хотод шилжин ирж Дорнод, Сүхбаатар, Жаргалант, Тэс угшлын адуугаар цус сэлбэн адуугаа улам бүр чанаржуулан С.Баатархүү, Д.Батчулуун нарын Улсын Алдарт Уяачдаас заавар зөвлөгөө авч уяаны эрдэмд улам бүр шимтэх болжээ. Түүнийхээ үр шимийг амсч 2003 онд А.Энхтайван ахынхаа халтар соёолонг аймгийн наадамд айрагдуулж, Эрдэнэтийн наадмаас анхны хишгээ хүртсэн гэнэ лээ. Хоёр жилийн дараа 2005 онд Орхон аймагт зохион байгуулагдсан “Тэсвэртэй Холч” морьдын улсын аварга шалгаруулах 110 километрийн уралдаанд “Аварга хээр” морио түрүүлгэж , хонгор азаргаа 2013 онд “Булган хангай-2011” хаврын бүсийн уралдаанд айргийн гуравт хурдлуулан , 2012 онд Нийслэлийн “тэргүүн хүлэг”шалгаруулах уралдаанд айргийн тавд давхиулж Орхон аймгийнхаа наадмуудад дөрөв түрүүлгэн, зургаа айрагдуулсан юм. Ийнхүү бурхны хүлгүүдийн уяаг тааруулахаар одсон ахынхаа хүслийг биелүүлэхээр ах Энхтөртэйгээ хамтран хичээсний үр дүнд 2012 онд улс , бүс, аймаг сумдын наадмаас 10 гаруй түрүү, 20 гаруй айраг хүртсэн амжилтаар Орхон аймгийн Алдарт уяач цолны эзэн болсон юм.
"Тод магнай" сэтгүүл. "Эрдэнэт хүлэг" МСУХ-ны 20 жилийн ойн тусгай дугаар. 2015 он

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна