Уралдаанч Г.Болд-Эрдэнэ: 2015 онд улсын бүсийн наадмаас хоёр айраг, аймгийн наадмаас гурван түрүү, долоон айраг авсан

Орхон аймгийн 2015 оны шилдгүүдийн нэг уралдаанч Г.Болд-Эрдэнийн ярилцлагыг уншигч танаа хүргэж байна.

-Хурдан морь унадаг болоод хэдэн жил болж байна вэ. Өнгөрсөн хугацаанд ямар амжилт үзүүлээд байгаа вэ?
-Есөн настайгаасаа эхлээд хурдан морь унаж байгаа. Одоо би 11 настай. Морь унахыг Мөнхбат ах маань зааж өгөөд хамгийн анх  овооны тахилга наадамд  шарга соёолонг нь унаж дөрөвт оруулсан. Түүний дараа тахилга наадамд дахин унаж гурваар давхиулаад зун аймгийнхаа баяр наадамд түрүүлгэсэн. Мөн тэр наадмаар Гантөмөр ахын даагыг унаж түрүүлгэсэн. Сая Булган аймагт болсон хангайн бүсийн уралдаанд Батбаяр ахын хул азаргыг унаж гурваар давхиулаад Гантөмөр ахын хул даагыг бас гурваар давхиж айрагдуулсан.
-Засгийн газрын тогтоолт бүсийн наадмаас хоёр айраг авчээ дээ?
-Тэгсэн. Энэ жил /2015 он/ би улсын бүсийн наадмаас хоёр айраг, аймгийн наадмаас гурван түрүү, долоон айраг авсан. Булганы наадмын дараа ММСУХ-ны 20 жилийн ойд очиж Батбаяр ахын хул азаргыг арваар, Гантөмөр ахын хул даагыг есөөр давхиулсан. 2015 оныхоо амжилтаар шилдэг унаач болж байгаа гэж Мөөнөө ах надад хэлсэн.
-Баяр хүргэе. Морь унахдаа гаргуун юм. Харин хичээлдээ хэр вэ?
-Баярлалаа. Хичээлдээ гайгүй ээ. Математикийн хичээлд илүү сонирхолтой.
-Том болоод ямар мэргэжилтэй болохыг хүсдэг вэ?
-Уяач.
-Тэгвэл сайн уяач болохын тулд яах ёстой вэ?
-Морио сайн мэддэг байх ёстой. Тэгэхийн тулд морио сайн унадаг байх хэрэгтэй. Одооноос морио сайн унаж сураад, том болоод сайн уяач болохын тулд хичээх болно. Яг л Мөөнөө ах шигээ.
-Морио унаад уралдааны замд гарахдаа миний морь тэдээр давхих байх гэсэн барагцаа төрөх үү?
-Төрнө.
-Тэр нь биеллээ олох уу?
-Олно.
-Уралдааны дараа унаач хүүхдүүд бөөгнөрөөд ярьж зогсоо харагддаг. Юуг тэгтлээ хөөрөлддөг юм бэ?
-Хэрхэн уралдсан тухайгаа л ярина даа. Миний морь тэгж давхисан, чинийх яасан гээд л. Бас бие биедээ зөвлөнө.
-Морь унахын хамгийн гоё нь юу вэ?
-Давхих. Бас түрүүлж, айрагдаад цоллуулж зогсох.
-Ирэх жилдээ илүү сайн уралдаж олон айраг, түрүү аваарай. Амжилт хүсье.
-Баярлалаа.
"Тод магнай" сэтгүүл. Эрдэнэтийн 20 жилийн ойн тусгай дугаар. 2015 он