Шилдэг уралдаанч Б.Эрхэмбаяр: ТҮРҮҮЛЖ, АЙРАГДАХ МОРЬ ӨГЛӨӨ НЬ ЗОЛ ОРЧИХСОН БАЙДАГ

Баянхонгор аймгийн Хүрээмарал сумын сурагч, шилдэг уралдаанч Б.Эрхэмбаярын ярилцлагыг уншигч танаа хүргэж байна.

-Хэдэн настай анх хурдан морь унаж сурсан бэ? 
-2008 оны хавар анх морь унаж сураад зун нь саарал морио унаж уралдаад хэд хэд айрагдуулж, түрүүлгэсэн. Тэгээд  2010 оноос хүрэн азаргаа, 2013 оноос зүүн талаас ирсэн халзан үрээг унаж байгаа. Манай хүрэн азарга хавчиг цагаасаа “Босоо хүлэг” галынхаа наадамд түрүүлж, Гандангийн Майдар эргэх ёслолын наадамд аман хүзүүдсэн. Түүнээс гадна сумын наадам, аймгийн бүсийн уралдаанд түрүүлж, айрагдсан. Ер нь хурдан адуу. Зүүн талаас ирсэн халзан үрээ болохоор 2013 онд хязааландаа сумынхаа наадамд гуравлаад, Баянбулагийн хангайн бүсийн наадамд аман хүзүүдэж, Бууцагаанд болсон ургийн баярт түрүүлсэн. Соёолондоо сумынхаа 90 жил, Говь-Алтай аймгийн Чандмань сумын 90 жилд тус тус түрүүлээд, Гурванбулагт болсон  хангайн бүсийн уралдаанд тавласан. Хавчигтаа Баянбулаг сумын наадамд аман хүзүүдсэн. Ийм амжилт үзүүлээд байгаа даа.
-Дандаа аавын тань уясан морьд уу?
-Тийм. Халиун үрээ энэ жил соёолон. Дааганаасаа эхэлж уягдаад шүдлэндээ сумынхаа 90 жилийн ойд дөрвөлж, өөр сумын наадамд айрагдсан.
-Хурдан морь унаад ямар амжилт үзүүлсэн бэ. Тоолж байсан уу?
-Найман жилийн хугацаанд бараг 30-40 айраг авсан байхаа. Ер нь би унаад айрагдуулаагүй удаа бараг байхгүй. 
-Хурдан морь унаад олон жил болсон байна. Ангийнхаа хүүхдүүдээс бие бялдраараа ялгарах уу?
-Сүүлээсээ гуравт жагсдаг. Жаахан намхан. Морь унах чадвараараа бол тэднээс илүү л дээ. Хашир, туршлагатай. Ядаж л нойронд сэргэг, тэвчээртэй. Гэхдээ би энэ жилээс томдоод бараг хасагдах байх. 
-Уралдааны өглөө морио барагцаалах уу?
-Барагцаална ш дээ. Түрүүлж, айрагдах морь өглөө нь зол орчихсон, адуу мал руугаа унгалдаад нэг тийм сэргэг байдаг.Манай морьд л лав тэгэхээрээ түрүүлдэг.
-Хамгийн ихээр догдлуулсан наадам...
-Сумын 90 жилийн ойгоор хоёр морь түрүүлгэж, нэг үрээ айрагдуулахдаа их баярласан. Энэ жил манай сургуулийн 90 жилийн ой болно. Болбол азарга ч гэсэн унах юмсан гэж бодож байгаа. 
-Чамайг хасагдчихаар танай морийг хэн унах вэ?
-Манай дүү гайгүй морь унадаг. Тэр л унах байх даа.
-Мэргэжлээ сонгосон уу?
-Уяач болно доо.
-Чиний мэдэх хамгийн сайн уяач хэн бэ?
-Даваахүү Тод манлай.
-Баянхонгороос...
-Олон хүн бий. Гэхдээ хонгор халзан морио Гиннесийн уралдаанд түрүүлгэсэн болохоор Цэндийн Энхтайваныг мундаг уяач гэж бодож байна. 
-Тэдэн шигээ сайн уяач болоорой. Амжилт хүсье.
-Баярлалаа.

"Тод магнай" сэтгүүл. Баянхонгор аймгийн тусгай дугаар