Шилдэг уралдаанч Г.Ганжаргал: ХҮҮХЭД БУРУУ УНАВАЛ МОРЬ АЙРАГДАХГҮЙ

Хонгор нутгийн уралдаанч хүүхдүүдийн буухиа үргэлжилсээр байгаа билээ. 2013 оны шилдэг уралдаанч Г.Ганжаргалын ярилцлагыг хүргэж байна.

-2013 оны шилдэг уралдаанчаар шалгарч байж. Тэр жил ямар амжилт үзүүлсэн бэ?
-Гурван сард Богд суманд болсон уралдаанд соёолонгоо түрүүлгэж, хонгор халзан хязаалангаа гурваар давхиулсан. Баян-Өндөр суманд болсон уралдаанд буурал соёолонгоо аман хүзүүдүүлж, хүрэн азаргаа тавлуулсан. Дараа нь  Баацагаанд  хул шүдлэнгээ хоёроор, Баянговьд хүрэн азаргаа гурваар, хул үрээгээ таваар давхиулаад Эрдэнэцогтод хүрэн азаргаа гуравлуулсан.
-Сумынхаа баяр наадамд морь унасан уу?
-Унасан. Их наснаас бусад таван насны морь  унаж буурал соёолонгоо түрүүлгэн, хул үрээгээ аман хүзүүдүүлээд, хонгор хязаалангаа дөрөвлүүлж, даагаа айрагдуулсан.
 Азарганаас бусад насыг түрүүлгэж, айрагдуулжээ?
-Тэгсэн. 2013 онд хоёр түрүү, арван айраг хүртэж сумынхаа шилдэг унаачаар шалгарсан. 
 Хэдэн жил  хурдан морь унаж байгаа билээ?
-Дөрвөн настай анх ааваараа морь унахыг заалгаад, таван настай хурдан морь унасан.Түүнээсээ хойш 22 түрүү, 30-аад айраг авсан байна лээ. Хамгийн анх Богд суманд болсон уралдаанд соёолон гурваар давхиулж байсан. Манайд надаас өөр морь унадаг хүүхэд байхгүй болохоор аав бид хоёр наадамд цуг явдаг. Намайг морио сайн унахаар аав ээж маань шагнадаг.
 -Унасан морио түрүүлгэж, айрагдуулан амжилт гаргахын тулд юун дээр анхаарах ёстой вэ?
-Морь айрагдаж, түрүүлэх нь хүүхдээс их шалтгаалдаг. Буруу унавал морь айрагдахгүй. Тийм болохоор уяачийнхаа хэлснийг сайтар дагаж, юу юугүй шахалгүй хашир явах хэрэгтэй.
 Танай ангид хурдан морь унадаг хүүхэд олон уу?
-Долоон хүүхэд байгаа. Одоогоор хамгийн өндөр амжилттай нь би. Манай сумын хамгийн сайн унаач бол Бямбабазар. Одоо морь унахаа больчихсон, 10-р ангид сурдаг юм. 
Хүүхдээр морь унуулахгүй байх тухай асуудал яригддаг болсон. Ийм шийдвэр гарвал яаж хүлээж авах вэ?
-Хүлээж авахгүй ш дээ. Морь унуулахгүй болчихвол муухай. Харин хүүхдүүдээ болгоомжтой унаарай гэж захих ёстой. 
Тэр ч тийм шүү. Том болоод ямар мэргэжилтэй болохыг хүсдэг вэ?
-Уяач болно. Тэгэхийн тулд эхлээд Сүхбаатараас сайн адуу авна даа.
Амжилт хүсье. Мөрөөдлөө биелүүлээрэй.

"Тод магнай" сэтгүүл. Баянхонгор аймгийн тусгай дугаар. 2016 он