Шилдэг уралдаанч А.Цэрэнтогтох: Хурдан морь унасан, шилдгээр шалгарсан

Баянхонгор аймгийн уралдаанч хүүхдүүдийн түүчээг Жаргалант сумын шилдэг уралдаанч А.Цэрэнтогтохын ярилцлагаар үргэлжлүүлж байна. Таалан болгооно уу.

-2015 онд сумынхаа шилдэг уралдаанчаар шалгарсан юм байна. Тэр жилийнхээ амжилтаас хуваалцаач?
-2014 оны хавар Ембүү хүрэнгээ унаж Заг сумын хаврын бооцоот уралдаанд дөрвөөр  давхиулаад сумандаа түрүүлгэсэн. Зун нь сумынхаа баяр наадамд түрүүлгээд Галуут суманд болсон хангайн бүсэд түрүүлгээд, Заг сумын 90 жилийн аман хүзүүдүүлсэн. Дараа нь Ламын Гэгээний ойд таваар давхиулсан. 2015 онд болохоор хаврын уралдаанд Ембүү хүрэнгээ түрүүлгэж, шарга үрээгээ айргийн гурваар давхиулсан. Дараа нь хоёрдугаар багийн их сорилго уралдаанд их насны морь есөөр оруулаад, азаргаа аман хүзүүдүүлж, соёолон, даага, шүдлэн тус тус гурав, хязаалан дөрвөөр давхиулсан. 
-2016 онд яаж наадсан бэ?
-Баянбулаг суманд болсон хангайн бүсийн уралдаанд Ембүүгээ аравт оруулсан.
-Ингэхэд хэдэн жил хурдан морь унаж байгаа юм бэ?
-2012 онд есөн настайдаа морь унаж сураад, 2013 онд хурдан морь унаж хоёрдугаар бригадын наадамд азаргаа 10, соёолонгоо 11-р давхиулсан. Тэгээд дараа жил нь олон айраг авч оны шилдэг унаач болсон. 
-Мундаг юмаа. Уралдааны өмнө  хэр догдолдог вэ?
-Маргааш уралдана гэхээр гоё санагдсан хэрнээ бас зүрх түгшээд байдаг юм. Миний унаж байсан морьдоос хамгийн хурдан нь Ембүү хүрэн. Ембүүгээ унаад мордохдоо түрүүлгэнэ дээ гэж боддог. Тэгээд тархинд гараад тасарчихвал тоос, шороо өлийнөөс холуур захлаад явчихдаг юм. 
-Чиний мэдэх Баянхонгорын хамгийн хурдан нь?
-Манай Ембүү хүрэн, Далбан хээр, Баацагааны Энхтөрийн Дэгдээхий хээр, Баян-Овоогийн Бүрэнтөрийн хүрэн халзан, Пүрэвсүрэнгийн Шодон буурал, Жаргалсайхан гуайн бор азарга.
-Морь унахаас бусад чөлөөт цагаараа юу хийдэг вэ?
-Хааяа бөмбөг тоглоно. Бас зураг зурна. Би Ембүү хүрэнгээ  зурсан ш дээ./инээв/
-Ирээдүйд ямар мэргэжилтэй болохыг хүсдэг вэ?
-Шүдний эмч болно. Яагаад гэхээр ээжийн маань шүд их өвддөг байсан болохоор тийм өвчтэй хүмүүсийг эмчилье гэж боддог. 
-Мөрөөдлөө биелүүлж сайн эмч болоорой. Амжилт хүсье.
-За баярлалаа.

"Тод магнай" сэтгүүл Баянхонгор аймгийн тусгай дугаар. 2016 он