Шилдэг уралдаанч Э.Санжаа: Улсын наадмын зам их гоё юм билээ

Баянхонгор аймгийн уралдаанч хүүхдүүдийн буухиа үргэлжилсээр. Энэ удаа Галуут сумын сурагч, 2015 оны шилдэг уралдаанч Э.Санжаатай хөөрөлдсөнөө уншигч танаа хүргэж байна.

-2015 оны аймгийн шилдэг уралдаанчид баяр хүргэе.
-Баярлалаа. Баярсайхан ахын хонгор даагыг унаж Хонгор хайрханы наадамд түрүүлгэж, Загт болсон уралдаанд  аман хүзүүдүүлж, сумын наадамд түрүүлгээд “Хонгорын шигшмэл хурд”-д гурваар  давхиулсан. Шарга соёолонг нь унаж “Хонгор хайрхан”-ы тахилга, Гурванбулаг, Заг сумдад болсон уралдаан болон ”Хонгорын шигшмэл хурд”-д түрүүлгээд улсад очиж 16-аар давхиулсан. Бас Эрдэнэцогтод болсон уралдаанд түрүүлж байгаад хадуурч 10 хавьцаа орсон.
-Отгоогийн хондон  морийг яаж давхиулсан гэлээ?
-Овооны наадамд түрүүлгээд, сумын наадамд аман хүзүүдүүлсэн.
-Аймгийн шилдэг уралдаанчаар шалгарсан тэр жилээ сумандаа бас тэргүүлсэн үү?
-Тэгсэн. Сумын шилдэг уралдаанч болоод аймгийн шилдэг унаач болж, өргөмжлөл, чихэр, цамцаар шагнуулсан. 
-Анх хэдэн настайдаа хурдан морь унасан гэлээ?
-Таван настайдаа өөрийнхөө хул үрээг унаж сумандаа болон Хонгор хайрханы тахилгад дөрвөөр давхиулсан. Тэр хул үрээг манай ах унаж, дааганд нь гурав түрүүлгэсэн юм.
-Ингэхэд улсын наадам хэр санагдсан бэ?
-Зам нь их гоё юм билээ. Их таалагдсан. Тэрний дараагийн гоё наадам бол Бууцагаанд болсон шигшмэл хурд. Яагаад гэвэл шарга соёолон маань түрүүлсэн. Би ч бараг л түрүүлэх байх гэж бодож байсан юм.
-Чиний мэддэг хамгийн сайн уяач хэн бэ?
-Аав, Баяраа ах хоёр. 
-Тэгвэл танай сумын хамгийн шилдэг хурдан морьд?
-Шарга соёолон, Шомбого ахын хүрэн азарга, манай хул үрээ. 
-Энэ сумын хамгийн шилдэг уралдаанчдыг нэрлээч...
-Билэгт ах, Билгүүнээ, Давааням, Даваадалай
-Том болоод ямар мэргэжилтэй болох вэ?
-Ямар сурдаг вэ?
-Сурлагаараа ангидаа хоёрт ордог.
-Мундаг хүү байх нь. Дараа дараагийнх нь уралдаануудад нь амжилт хүсье.
-Баярлалаа. Сэтгүүл хийж байгаа ах эгч нартаа баярлалаа.

"Тод магнай" сэтгүүл Баянхонгор аймгийн тусгай дугаар. 2016 он