2013 оны шилдэг уралдаанч Э.Жигмэдсүрэн: Зуулттай нэг хэвийн зугуухан явах нь зөв

Баянхонгор аймгийн Эрдэнэцогт сумын сурагч Э.Жигмэдсүрэнг уншигчидтайгаа уулзуулж байна. Тэрээр 2013 оны шилдэг уралдаанч юм.

-Шилдэг уралдаанч хэзээнээс хурдан морь унаж байгаа билээ?
-Таван настайдаа морь унаж сураад, 2013 оноос шар хээр морийг унасан. Анх унасан жилээ Эрдэнэцогт сумынхаа 90 жилийн ойд түрүүлгээд дараа жил нь Өлзийтийн 90 жилийн ой болон сумынхаа наадамд түрүүлгэсэн. Бас Баянзүрх хайрханы тахилга наадамд түрүүлсэн.
-Анх морь унасан жилээ шилдэг уралдаанчаар шалгарсан юмаа даа?
-Тиймээ. Тэгээд өнгөрсөн жил аймгийн наадамд шар хээрийгээ аман хүзүүдүүлсэн. Хээр морь гараа сайтай. Эхний 20 дотор найдвартай гарна. Тэгээд л тэр чигээрээ явчихдаг юм. Араас морь ирвэл ухасхийгээд холдчихно. Ер нь гайгүй дээгүүр гарчихвал заавал айрагддаг.
-Хээр мориноос өөр морь унадаг уу?
-Дүү цагаан хонгор үрээг нь унаж овооны наадамд 10 дотор давхиулсан.
-Унасан морио түрүүлгэж, айрагдуулахын тулд яах ёстой вэ?
-Мориныхоо амыг нь зөв тааруулж явах хэрэгтэй. Хэтэрхий эрт тавьчихаар морь суучихдаг юм. Зуулттай нэг хэвийн зугуухан явах нь зөв. Бас суулт их чухал. Би хөлөө сул тавиад тэгшхэн суудаг.
-Зурагтаар гарч байгаа уралдаануудын бичлэгийг үздэг үү?
-Үзнээ. Малчин телевизийг илүү үздэг. Эрдэнэчулууны хос шарга, Улааны Аварга зээрд гээд улсад түрүүлдэг хурдан морьдын тухай үзэх дуртай.
-Танай нутгийн ямар хурдан морьд байна вэ. Танилцуулаач?
-Шар хээр морь их нас дотроо хамгийн хурдан нь. Харин азаргануудаас Намнангийн хар алаг азарга хурдан. Сумын 90 жилийн ой болон олон овооны наадамд түрүүлсэн адуу.
-Ирээдүйд ямар мэргэжилтэй болохоор төлөвлөж байна вэ?
-Малчин болно гээд долдугаар ангиасаа сургуулиас гарчихсан. Мал маллах сайхан ш дээ. Ядаж л эрүүл агаарт. 
-Тийм шүү. Сайн малчин болоорой. Амжилт хүсье.
-Баярлалаа.
"Тод магнай" сэтгүүл Баянхонгор аймгийн тусгай дугаар