Аймгийн Алдарт уяач Ж.Эрдэнэтөгс: "Ялгалт хийхгүй бол цагаан үрээ маань яах бол" гэж санаа зовж байлаа

- Төрийн наадмын хязаалан насны морьдын уралдаанд хүрэн үрээ тань аман хүзүүдлээ. Морьд барианд орж ирэх агшинд юу бодогдож байв?
-Монгол төрийнхөө наадамд хязаалан үрээ айрагдуулсандаа маш их баяртай байна. Морьд барианд орж ирэхэд миний хүрэн үрээ зургаагаар орж ирсэн. Морины комиссын шийдвэрээр эхний дөрвөн хязааланг хассанаар манай хүрэн үрээ аман хүзүүнд орлоо. Үүнээс өмнө 2013 онд улсын баяр наадамд анх хурдан хүлгүүдийнхээ тоосыг өргөхөөр зорьж ирээд хээр шүдлэнгээ мөн аман хүзүүнд хурдлуулж байлаа. Тэгэхэд бас эхний дөрвөн үрээ үүлдэрлэг байдлаар хасагдаж байсан юм.
-Энэ жилийн улсын наадмын хувьд ялгалт, хасалт гээд нэлээд хөл хөдөлгөөнтэй байлаа. Та хэдэн насны морь уяж ирээд, хэдийг нь мордуулсан бэ?
-Би шүдлэн, хязаалан хоёртой ирсэн. Шүдлэн цагаан үрээ гурваар хурдаллаа. Цагаан үрээ маань манай ах Донхорын Сумъяасүрэнгийнх. 
- Таны хувьд одтой сайхан наадаж байгаа юм байна. Энэ жилийн баяр наадмын талаар ямар сэтгэгдэлтэй байгаа вэ?
-Тиймээ. Ямар ч байсан монгол адуунууд айрагдсан. Эрлийз, монгол адуу холимог уралдвал цагаан үрээ маань яах бол гэж санаа зовж байсан юм. Эрлийз адуугүй миний хувьд ялгалт хийсэн нь тун зүгээр л санагдаж байна.
- Та өмнө нь ахынхаа нэр дээр морьд мордуулж байсан гэж ярилаа. Ер нь таны нэртэй морьд хэдий үеэс уралдаж эхэлсэн бэ?
-Би 2003 оноос Бирозана багшдаа шавь орж, морь уяж эхэлсэн. Мөн Баярсайхан ахаасаа ч зөвлөгөө заавар авч байлаа Баярсайханы Лхагва-Очир бид хоёрын хувьд энэ хоёр хүнийг л дагаж морь уяж эхэлсэн хүмүүс дээ. Харин 2010 оноос бие даан морь уяж байна.
- Уяач ахтай юм байна. Танай удмынхан дунд уяачид олон бий юү?
-Миний ээжийн аав Даваасүрэн гэж морь уядаг хүн байсан юм. Намайг жаахан байхад надад зүсэлж өгсөн их хурдан хүрэн морь байлаа. Харин аавын талынхан дунд морь уядаг хүн байгаагүй. Тэднийхнээс моринд орсон анхны хүн нь л Баярсайхан ах байх шүү. Аавын маань төрсөн дүү байгаа юм.
- Та улсын бүсийн уралдаанаас хичнээн айраг, түрүүтэй билээ?
-Ноднин жил Говийн бүсийн уралдаанаас дээд гурван насны айраг хүртсэн. Мөн ММСУХ-ны 20 жилийн ойн уралдаанд соёолон айрагдуулж байлаа. Энэ жил цагаан үрээ маань Говийн бүсийн наадамд айрагдаад, сая төрийн наадамд гурваар давхилаа.
- Уяач хүнд уралдаан, наадам болгон л сайхан дурсамж үлдээдэг байх. Тэдгээрээс онцлон дурсах дуртай, дурсах бүртээ огшдог онцгой дурсамжтай наадам гэвэл та хэдэн оны наадмыг ярих вэ?
-Ноднин жил Говийн бүсийн уралдаанаас дээд гурван насны айраг хүртсэний нэг нь Өмнөговь аймгийн Даланзадгад сумын уяач Энхчимэг найзын маань морь байсан юм. Өөрөөр хэлбэл, би тэр уралдаанд өөрийн нэр дээр хоёр адуу айрагдуулсан юм л даа. Тэр наадам хамгийн сайхан дурсамж үлдээсэн дээ.
- Баярлалаа. Ингэж сэтгэлийг тань огшоосон наадам олон тохиох болтугай.

А.Тэлмэн