Чингисийн баатрууд Оскарт

Дэлхийн кино урлагийн шилдгүүдийг тодруулдаг  академийн дээд шагнал гардуулах 90 дэх удаагийн Оскарт Монголчуудын бүтээл өрсөлдөхөөр болжээ. Тодруулбал монгол улсын тусгаар тогтнолын баталгаа болсон эрийн гурван наадам тэр дундаа хурдан морины уламжлалт уралдааны онцлог, мориор дамжсан үндэсний өв соёл, зан заншлыг харуулсан “Чингисийн хүүхдүүд” уран сайхны кино Оскарын “Гадаад хэл дээрх кино”-ны төрөлд Монгол Улсаа төлөөлөн анх удаа албан ёсоор өрсөлдөх эрх авчээ. Хурдан морь унах хүсэлдээ хөтлөгдсөн Бямбаа хүү морь уях эрдэмт бие даан суралцах зуураа унаач хүүхдүүдэд хамгаалалтын хувцас тараахаар ирсэн НҮБ-ын ажилтан Саратай танилцан “морь уях нь монгол эрчүүдэд тэнгэрээс өгсөн үүрэг. Монгол хүн морио унаж, ахуй соёлтойгоо ойр байх ёстой. Монгол хүүхдүүд морио унаж эр бие нь жавжаачдаг. Тэд хүлгийн нуруун дээр байхдаа хамгаас жаргалтай” гэдгийг ойлгуулдаг байна. Морин уралдаан тойрсон элдэв таагүй яриа газар авч, хүүхдүүдийн морь унах урам зоригийн мохоож буй энэ  цаг үед  нүдээ олсон “Чингисийн хүүхдүүд” уран сайхны кино 200  сая төгрөгийн зардлаар жил гаруйн турш  бүтээгдсэн байна. Уг кино 2017 оны гуравдугаар сарын 23-ны өдөр АНУ-ын кино ассоциацаас АНУ-д гарах лиценз болох “Бүх насныхан” ангиллыг албан ёсоор авсан Монголын анхны кино бөгөөд одоогоор 10 гаруй олон улсын кино наадамд амжилттай оролцоод байгаа бөгөөд ирэх онд ч гэсэн Нью-Йорк, Сочигийн кино наадам зэрэг олон улсын 10 наадамд оролцох урилга хүлээн аваад байгаа гэнэ.
Б.Эрдэнэсүрэн