Аймгийн Алдарт уяач Д.Доржхорлоо: Улсын бүсийн уралдаанаас хоёр дахь айргаа хүртлээ

А.Тэлмэн
2017 оны 10-р сарын 13 -нд

- Улс, бүсийн довтой азаргануудтай эн тэнцүү уралдсан хурдан шаргын эзэнд баяр хүргэе?
-Баярлалаа.Шарга азарга маань Өвөрхангай аймагт болсон хангайн бүсийн уралдаанд айргийн гуравт хурдлан эзэн намайгаа баярлууллаа. Үүнээс илүү сайхан зүйл гэж юу байхав.
- Та хэд дэх жилдээ Монгол төрийн наадамд уясан хүлгүүдээ мордуулж байна вэ?
-Хоёр дахь жилдээ улсынхаа баяр наадамд морь мордуулж байна. Өнгөрсөн жил халтар хязаалан, зээрд азарга хоёртойгоо ирсэн. Зээрд азарга нэг хэсэг өнгөлж яваад суугаад 36-гаар, харин халтар үрээ маань 90 хавьцаа давхисан даа. Миний зээрд азарга бол Хэнтий аймгийн Мөрөн сумын харьяат Я.Болдын унаган адуу. Би дааганд нь авч байсан юм. Дааганаасаа эхлээд өнөө жилийг хүртэл өнжилгүй уралдаж намайг олон удаа баярлуулсаан. Хязааландаа Архангай аймгийн 90 жил, хангайн бүсийн уралдаанд айргийн тавд  хурдалж байсан. Мөн Өвөрхангай аймагт болсон Төрийн түмэн хүлгүүд уралдаанд дөрвөөр давхиж, Эрдэнэчулуун Тод манлайн мялаалга наадамд түрүүлсэн. 20 гаруй медальтай сайхан буян бий.
- Тэгвэл халтар үрээний тухайд...?
-Хэнтий аймгийн Хэрлэн сумын харьяат Энхбаатар гэдэг хүний адуу. Би дааганд нь эхтэй нь авсан юм. Тэр жилээ Өвөрхангай аймгийн наадамд гурваар давхиад, дараа жил нь дахиад гурвалсан. Энэ жил соёолон Хонхорын хоолой гэдэгт болсон уралдаанд дөрөвт, аймгийнхаа бүсэд есөд давхилаа.
- Өнөө жилийн тухайд төрийнхөө наадамд хэдэн насны морьтой ирсэн бэ?
-Улсад ганцхан шарга азаргатайгаа л очсон. Уг нь бараг айрагдчих болов уу гэж бодож байтал арай чадсангүй. Онон гуайн хэлдгээр ажил дутсан байж мэднэ. Яагаад гэхээр би энэ жил шарга азаргаа ганц л сунгасан юм.
- Төрийн зарлигт наадмаас хоёр айраг хүртэж. Хэдий үеэс морь уяж байгаа билээ?
-Миний аав уяач хүн. Харин миний хувьд төрийн албан хаагч байсан учраас харьцангуй  хожуу буюу  2009 оноос морь уяж байгаа. 2016 онд аймгийн Алдарт уяач цол хүртсэн.
- Залуу Алдартын бахдалтай дурсамжаар яриагаа өндөрлөе.
-2011 онд зээрд азарга маань даагандаа ургийн баярт айрагдаж, анхны медалийг авчирч байсан нь  одоо ч санаанаас гардаггүй. Мөн 2013 онд улсын бүсийн уралдаанд зээрд азаргаа айрагдахад их баярласан.
- Ийм бахдалт наадмууд олон байх болтугай. Ярилцсанд баярлалаа.
-Баярлалаа. Та бүхний ажилд амжилт хүсье.

А.Тэлмэн

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна