Нийслэлийн Алдарт уяач Д.Ариунбаяр: Шадар сайдын шийдвэрийг сонсоод ирж уралдахаар шийдсэн нь зөв болжээ

АХ-ын 96 жилийн ой, монгол төрийн наадмын хурдан шүдлэнгийн уралдаанд хонгор халзан шүдлэнгээ айргийн тавд хурдлуулсан Төв аймгийн Бүрэн сумын харьяат, Нийслэлийн Алдарт уяач Дашпүрэвийн Ариунбаяртай цөөн хором ярилцлаа.
-Төр түмнийхээ их баяр цэнгэл наадамд хурдан хүлгээ айрагдуулсан танд баяр хүргэе.
-Баярлалаа.
-Халзан үрээ хаанахын адуу билээ. Удам угшлыг нь танилцуулаач?
-Дорноговь аймгийн Шивээговь сумын харьяат аймгийн Алдарт уяач Адъяасүрэн гуайн унаган адуу. Эх нь говийн загалуудын угшилтай, эцэг нь халзан азарга байдаг юм.Алдартын хүү Нямка гээд найз маань миний хүүд бэлэглэсэн юм. Өгье гэж өгсөн юм байлгүй.Хонгор халзан үрээ маань ирсэн цагаасаа эхлээд урамтай сайхан давхиж байгаа.
-Хэд түрүүлж, хэд айрагдаад байгаа вэ?
-Сөнгө даага жаахан бяргүйдээд байсан юм. Гэхдээ Алтанбулагын наадамд айрагдаад, Төв аймагт 10 гарч давхисан. Өнөө жилийн тухайд дан уяагаар төрийнхөө наадамд уралдлаа. Эрлийз монголоор нь ялгана гэсэн Шадар сайдын шийдвэрийг сонсоод ирж уралдахаар шийдсэн нь зөв болжээ. Ингэж л ялгахгүй бол бэлчээрийн монгол адуу барахгүй шүү дээ.
-Шадар сайдын шийдвэр олон уяачийг наашаа зүглүүлсэн бололтой?
-Тэр холоос зорьж ирэхэд хөлийн хурдтай эрлийз адуутай холиод уралдуулчихаар хөдөөний бидэнд үнэхээр урам байдаггүй. Тэгж байснаас сумандаа уралдчихсан нь дээр байдаг юм. Одоо ийм сайхан тушаал гараад монгол, эрлийзээр нь сайн ялгаж эхэлж байгаа болохоор төрийнхөө наадамд ирж оролцоноо.
-Хэдэн насны морьтой ирсэн бэ?
-Шүдлэн, хязаалан хоёртой ирсэн. Хоёр хязаалантай ирээд хоёуланг нь хасуулчихлаа.
-Хасагдахаар үрээнүүд байсан юм уу?
-Нэг монгол, нөгөө нь эрлийз байсан юм.
-2017 он гарсаар хаагуур ямар амжилттай наадав?
-Хавар ганц нэг уралдсан.
-Удам залгасан уяач гэж сонссон. Тэр талаараа дэлгэрүүлээч?
-Манай аав нийслэлийн Алдарт уяач Дашпүрэв гэж хүн бий. Төрийн наадамд их морь айрагдуулж байсан. Аавын аав Төв аймгийн Бүрэн сумын харьяат адуу сайхан малладаг хүн байсан. Мөн манай ээжийн аав Дунгаабазар гэж хүн улсын наадамд азарга аман хүзүүдүүлж байсан, шүдлэн түрүүлгэж байсан.
-Хэдэн оны наадамд вэ?
-1976 онд билүү?
-Аавын чинь хувьд төрийн зарлигтай баяр наадмаас хичнээн айрагтай вэ?
-2010 онд их морь улсад айрагдуулаад, Их хурдад айрагдуулаад, 2005 онд Довдонбалжирын саарал үрээг шүдлэн байхад нь улсад айрагдуулаад, хязаалан айрагдуулаад, хязаалан Говьшанхад бас айрагдуулж байсан.
-Удам дамжсан уяачийн дараа дараагийн уралдаануудад амжилт хүсье.
-Маргааш азарга мордуулна. Өнгөрсөн жил би СГЗ Адъяагийн Баярмагнайн хонгор соёолонг уяж улсад арваар давхиулсан. Түүнээс өмнө 2013 онд Өвөрхангайн бүсэд Эрхэмбаяр хурандаагийн зээрд морь айрагдуулж байсан. Тэрнээс хойш улс бүсэд морь айрагдуулаагүй байж байгаад өнөөдөр айрагдууллаа.
-Дахин амжилт хүсье.
Б.Эрдэнэсүрэн