Аймгийн Алдарт уяач Ж.Эрдэнэтөгс: Цагаан үрээ тав дахь айргаа хүртлээ

АХ-ын 96 жилийн ой үндэсний их баяр цэнгэл наадмын хурдан шүдлэнгийн уралдаанд айргийн гуравт хурдалсан Дундговь аймгийн Эрдэнэдалай сумын харьяат Донхорын Сумъяасүрэнгийн цагаан үрээг уяж хурдлуулсан Хулд сумын харьяат, аймгийн Алдарт уяач Ж.Эрдэнэтөгстэй цөөн хором ярилцснаа хүргэж байна.
-Наадмын эхний өдөр айраг хүртэн одтой сайхан наадсан танд баяр хүргэе.
-Баярлалаа.Цагаан үрээ маань айргийн гурваар хурдаллаа. Баяртай сайхан байна.
-Манай уншигчдад өөрийгөө танилцуулахгүй юу?
-За би Дундговь аймгийн Хулд сумын харьяат Жаргалсайханы Эрдэнэтөгс гэж хүн байна. Энэ бол миний ах Дундговь аймгийн Эрдэнэдалай сумын харьяат Донхорын Сумъяасүрэн гэж хүний адуу. Манай өвөөгийн төрсөн дүү нь байгаа юм. Ахынхаа үрээг уяж төрийнхөө наадамд айрагдуулсандаа баяртай байна.
-Төрийн наадмын хишиг хүртээсэн хурдан хүлгээ танилцуулаач?
-Сүхбаатар аймгийн Асгат сумын харьяат Дугарын Цогбаяр гэж  хүний унаган адуу. Шөвгөр зээрдийн эзэн шүү дээ. Миний ах Сумъяасүрэнгийн Төрбат  дааганд нь худалдаж аваад ноднин хоёр айрагдуулсан. Энэ жил над дээр ирээд тав айрагдлаа.
-Даагандаа хаана болсон ямар уралдаанд  айрагдаж байсан юм бэ?
-Дундговь аймгийн Хулд суманд болсон  овоо тахилгын наадамд нэг түрүүлж, нэг айрагдсан.
-Өнөө жилийн тухайд?
-Өнөө жилийн хувьд хамгийн анх Өмнөговь аймгийн Ханбогд суманд болсон аймгийн зүүн бүсийн уралдаанд айргийн гурваар давхиад, Өмнөговь аймгийн төвийн бүсийн уралдаанд аман хүзүүдсэн. Түүний дараа Мандал-Овоо суманд болсон “Мандалын хурд”-д гурвалаад, Далангийн хонгор овооны тахилгат мөн гурваар давхисан.
-Хүйн долоон худагт хэзээ ирсэн бэ?
- Өчигдөр /07 сарын 9 нд/ хот руу ирж хоночихоод өнөөдөр Хүйн долоон худагт ирж уралдаад айрагдлаа.
-Бүртгүүлсэн 254 үрээнээс 59 нь л мордлоо.  Ялгалтын талаарх сэтгэгдлээсээ хуваалцаач?
-Монгол үрээ бас хасагдсан гэж байна лээ. Ямартаа ч ялгах нь зөв.
 -Улсын наадамд хэд дэх жилдээ оролцож байгаа вэ?
- 2013 онд  МУ-ын Алдарт уяач Б.Баярсайханы ахыгаа дагаж ирээд Улс хээр азаргаа шүдлэн  байхад нь аман хүзүүдүүлж байсан. Ер нь тэр хүнийг дагаж морь уяж сурсан даа.
-Ярилцсанд баярлалаа. Дараа дараагийн уралдаануудад нь амжилт хүсье.
-Баярлалаа.

Б.Эрдэнэсүрэн