Шилдэг уралдаанч Б.Баянжаргал: Уралдааны өглөө морины маань нүд нь сэргэг байвал дээгүүр давхичихаад байдаг юм

Баянхонгор аймгийн Бууцагаан сумын Шилдэг уралдаанч Б.Баянжаргал хүүгийн яриаг уншигч танаа хүргэж байна.
-2012 оны сумын шилдэг уралдаанч юм байна. Тэр жил ямар амжилттай хаагуур, хаагуур наадсан бэ?
-Тиймээ, 2012 онд гаргасан амжилтаараа шилдэг уралдаанч болж байлаа.  Тэр жил би сумынхаа баяр наадамд Баянхонгор аймгийн Бууцагаан сумын харьяат, аймгийн Алдарт уяач Мандахын хонгор морийг унаж түрүүлгэсэн юм. Харин азарганд Баянхонгор аймгийн Баянбулаг сумын харьяат, аймгийн Алдарт уяач Дагвабазарын саарлыг дөрөвлүүлсэн. Хаврын уралдаанд аймгийн Алдарт уяач Бууцагаан сумын харьяат Эрдэнэбулганы алаг соёолонг мөн унаж түрүүлүүлсэн. Энэ нь Бууцагаан сумын Буянтын хурд уралдаан байгаа юм.
-Өөр?
-Тэр жил бас “Хангайн хурд”-д очиж Баянхонгор аймгийн Баянбулаг сумын харьяат, аймгийн Алдарт уяач Дагвабазар ахын саарал азаргыг гуравлуулсан. Харин Мандахын хонгор морийг түрүүлгэсэн бол дааганд Дагвабазар ахын хулыг айргийн таваар хурдлууллаа.
-Энэ бүгд  2012 онд гаргасан амжилтууд байх нь ээ. Мундаг байна шүү?
-Тиймээ, 2012 оны амжилтууд.  Ингээд сумын шилдэг уралдаанч болсон юм.
-Хурдан морь унаад хэдэн жил болж байна вэ?
-Анх 2008 онд хонины морь унаж эхэлж байлаа. Харин дараа жил хурдны морь унах болсноос хойш долоон жил өнгөрсөн байна.
-2009 онд анх хэний ямар морийг унаж байв?
-Магнай ахынхаа хонгор морийг унаж багийн наадамд аман хүзүүдүүлсэн. Дараа нь Бууцагааны Сүхбат гэж хүний буурал азаргыг Бууцагаанд унаж айргийн таваар давхиуллаа. Залгаад Хүрээмаралд нэг унаж арав дотор ирсэн.
-Өнгөрсөн хугацаанд хичнээн айраг түрүү авсан бэ? 
-Арав гаруй түрүү, хорь гаран айраг авсан байх шүү. Гэхдээ нарийн тоолж байгаагүй юм байна.
-Эдгээр наадмуудаас хамгийн сайхан нь ямар наадмыг гэж боддог вэ?
-Сумын наадам сайхан шүү. Би нэг наадмаар гурван түрүү, хоёр айраг авч, нэгийг зургаалуулсан юм. Одоо ч их гоё санагддаг. 
-Хамгийн олон удаа түрүү, айрагт багтсан нь хэний ямар морь байна вэ?
-Баянхонгор аймгийн Баянбулаг сумын харьяат Дагвабазарын саарал азарга, Мандахын шарга азарга байна. Насны зөрүүтэй л дээ. Одоо би шаргыг нь унаж, дүү саарлыг нь унаж байна.
-Дараа дараагийн уралдаануудад нь амжилт хүсье.

"Тод магнай" сэтгүүл Баянхонгор аймгийн тусгай дугаар