Төрийн хишигт уяачид

Улсын баяр наадмыг зохион байгуулах комиссоос өргөн мэдүүлсэн саналыг үндэслэн Монгол Улсын Ерөнхийлөгч Ц.Элбэгдорж ХYII  жарны  улаагчин гал тахиа жилийн босгон дээр зарлиг гаргаж, олон жил хурдан морины уяа сойлго тааруулж улсын хэмжээний наадмуудаас түрүү, айраг авсан нэр бүхий уяачдад улсын цол хүртээлээ. Уяачдын цолыг Монгол Улсын Ерөнхийлөгч Ц.Элбэгдорж өнөөдөр Төрийн ордонд гардуулан өгөв.
Монгол Улсын Ерөнхийлөгч Ц.Элбэгдорж уяачдад цол гардуулсны дараа хэлсэн үгэндээ “Та бүхний энэ өдрийн түмэн амар амгаланг айлтгая. Дээд ивээлээ хайрласан бичин жил улирч, буян хишгээ дэлгэх улаагчин тахиа жил айлчлан ирж байгаа энэ өлзийт сайн цаг дор нүүдлийн соёл иргэшлийн амин чухал дархлаа-адууны соёлыг өвлөн уламжилж, хадгалан хамгаалж, баяжуулан хөгжүүлж яваа хүндэт уяачид та бүхэндээ чин сэтгэлийн мэндчилгээ дэвшүүлж, хамгийн сайн бүхнийг хүсэн ерөөе.
Монголчуудын сүлд хийморь, бэлгэдэл молор эрдэнэ цагийн цаг, үеийн үед монгол хүнтэй хамт явж ирсэн. Тиймээс ч бид монгол хүнийг морин эрдэнэтэй нь цуг төрийн сүлдэндээ мөнхөлсөн. Монголчуудын баатарлаг түүх, бахархам амжилт адуутай холбоотой байдаг. Мориндоо мордсон монгол хүн түүхийг бүтээж, алдар суугаа мандуулдаг жамтай.
Гурван цагийн хэлхээнд үл алдрах их түүхийн алтан цулбуурыг морь уях эрдмээрээ өвлөж, монгол бахархлаа дархлан яваа хүмүүс бол манай уяачид, малчин түмэн юм. Түмний наадамд өргөсөн хүлгийн тань шандас, зон олноо цэнгүүлсэн золбоо хийморь, хүч хөдөлмөрийг тань үнэлж улсын цол хүртээлээ. Ажнай хүлгийг тань унаж хурдлуулсан хүүхдүүд, гэр бүлийнхэнд тань баяр хүргэе. Адууны соёлыг алдаршуулан дэлгэрүүлж Монгол түмнээ олон жил баярлуулж явахыг чин сэтгэлээсээ хүсч байна.
Хүүхдийн гийнгоо цээл, хүлгийн давхил төгөлдөр, уяачдын эрдэм төгс байг ээ. Сар шинэдээ сайхан шинэлээрэй” гэлээ.
Тод манлай уяач цолоор:
1.Говь-Алтай аймгийн Халиун сумын уугуул, МУ-ын Манлай уяач Туваанжавын Гантөмөр
2.Төв аймгийн Батсүмбэр сумын уугуул, МУ-ын Манлай уяач Сундуйн Лувсанбалдан
3.Өвөрхангай аймгийн Хайрхандулаан сумын уугуул МУ-ын Манлай уяач Бат-Өлзийн Отгоннасан
4. Төв аймгийн Сэргэлэн сумын уугуул МУ-ын Манлай уяач Ононгийн  Батбилэг
5. Ховд аймгийн Дарви сумын уугуул МУ-ын Манлай уяач Түвдэнгийн Батцоож
Манлай уяач цолоор:
1.Хөвсгөл аймгийн Мөрөн сумын харьяат МУ-ын Алдарт уяач Түдэндоржийн Болдбаатар
2. Архангай аймгийн Төвшрүүлэх сумын уугуул МУ-ын Алдарт уяач Өлзийхутагийн Пүрэвбаатар
3.Завхан аймгийн Тосонцэнгэл сумын уугуул МУ-ын Алдарт уяач Төмөрбаатарын Галбадрах
4. Говь-Алтай аймгийн Бигэр сумын уугуул МУ-ын Алдарт уяач Лхагвын Батмөнх
5. Өмнөговь аймгийн Даланзадгад сумын уугуул аймгийн Алдарт уяач Бадамгаравын Бадраа
6.Ховд аймгийн  Алтай сумын уугуул МУ-ын Алдарт уяач Цэдэвийн Гантөмөр
7. Төв аймгийн Сэргэлэн сумын уугуул МУ-ын Алдарт уяач Түмэндэлгэр Ихбаяр
Алдарт уяач цолоор:
1.Төв аймгийн Сэргэлэн сумын харьяат аймгийн Алдарт уяач Баттулгын Сүхбаатар
2.Төв аймгийн Лүн сумын уугуул аймгийн Алдарт уяач Базардарийн Баасанбазар
3. Улаанбаатар хот Багахангай дүүргийн харьяат Нийслэлийн Алдарт уяач Ганбаатарын Буянтогтох
4.Төв аймгийн Сэргэлэн сумын харьяат залуу уяач Ононгийн Батболд
5. Төв аймгийн Сэргэлэн сумын харьяат нийслэлийн Алдарт уяач Сантүндэвийн Хэрлэн
6. Дундговь аймгийн Хулд сумын уугуул аймгийн Алдарт уяач Сосорын Мөнхбат
7. Дундговь аймгийн Хулд сумын уугуул аймгийн Алдарт Баярсайханы Лхагва-Очир
8. Завхан аймгийн Түдэвтэй сумын уугуул, аймгийн Алдарт уяач Гомбожавын Баярцогт
9.Увс аймгийн Тэс сумын уугуул, аймгийн Алдарт уяач Юнэрэнгийн Төгсжаргал
10.Өвөрхангай аймгийн Есөнзүйл сумын уугуул, аймгийн Алдарт уяач Пүрэвийн Сэргэлэн
11.Говь-Алтай аймгийн Шарга сумын уугуул аймгийн Алдарт уяач Намсрайжавын Зоригт