“Уран дөш” МСУХ-ны дэд тэргүүн П.Наранбаатар: Сумынхаа адууны удам угшлыг нь сайжруулах зорилт тавин ажиллаж байгаа

Хэнтий аймгийн Норовлин сумын харьяат, “Уран дөш” МСУХ-ны дэд тэргүүн П.Наранбаатартай хийсэн ярилцлагыг уншигч танаа хүргэж байна.
-Таны хувьд “Уран дөш” МСУХ-нд “данстай” болсон үе хэзээ вэ?
-Манай “Уран дөш” уяачдын холбоо байгуулагдаад арав дахь жилийнхээ нүүрийг үзэж байна. Албан ёсны тамга тэмдгээ авч үйл ажиллагаагаа эхэлсэн нь 2005 он. Миний хувьд 2013 оны нэгдүгээр сараас уяачдын холбооны дэд тэргүүний ажлыг хийж байна. Холбоонд маань дөрвөн багийн хоёр, хоёр тэргүүлэгч болоод тэргүүн, дэд тэргүүн, санхүү бичиг баримтаа хариуцсан нарийн бичиг, мориныхоо уяа талыг хариуцсан нарийн бичиг нар ажилладаг. Манайх 80 гаруй гишүүнтэй. Харин холбоог “ЭБЭГ” ХК-ийн захирал Намсрайн Ариунбилэг гэж  Норовлингийн унаган хүү  тэргүүлдэг юм.
-Өнгөрсөн жил “Уран дөш”-ийн уяачид хичнээн айраг, түрүүтэй наадав?
-Манай уяачид зохион байгуулалттайгаар наадам­ладаг болсон. Өнгөрсөн жил гэхэд Цагаан-Овоо, Хөлөнбуйр, Баян-Овоо, Батноров, Баян-Адрага, Дадал, Бэрх зэрэг сумын наадамд очиж дөрвөн түрүү, 12 айраг авлаа. Аймгийн наадмаас Нарангэрэл ахын уяж сойсон хээр хязаалан түрүү магнай болж, торгон жолоо өргүүллээ. Бас залуу уяач Ж.Энхбатын хүрэн зээрд морь айргийн тавд давхилаа гээд чамлахааргүй сайхан наадсан. Холбооны хувьд ч сумынхаа хурдан морьдын удам угшлыг нь сайжруулах, санхүүгийн чадамжаа дээшүүлэн, улмаар улс, бүсийн наадмуудад хүч үзэх зорилт тавин ажиллаж байна. Одоогоор бид улсад очиж амжаагүй л байна. Гэхдээ сум тойрсон бүсийн наадам, өвлийн Дүнжингарав уралдаанд очиж байсан. Бас Дорнодын бүсэд айраг, түрүү ч авч байлаа. Түрүү жил Хэнтийн бүсийн наадамд хязаалангийн аман хүзүүг авсан бол Дадалд бага гурван насыг бүсчилэхэд нэг айрагтай ирсэн.
-Холбооноос зохион байгуулдаг уралдаан гэж байдаг уу?
-Өнгөрсөн хавар уяачдын холбооны нэрэмжит анхны бага насны уралдааныг сумандаа амжилттай зохион байгуул­лаа. Мөн манай сумын 90 жилийн ойн хурдан морины уралдааныг уяачдын холбоо, морины комисстой хамтран явууллаа. Наадмын маргааш уяачдын холбооны баярыг уламжлал ёсоор гурав дахь жилдээ хийлээ.
-Норовлин сумын хэмжээнд улс, аймаг, сумын цолтой хичнээн уяач байна вэ?
-Одоогоор улсын цолтон төрөөгүй л байна. Харин аймгийн Алдарт уяач 12, сумын цолтой 24 хүн бий.
-Харин таны хувьд уяа эвлүүлж байна уу?
-Миний аав морь уядаг байлаа. Тиймдээ ч тав, зургаан настайдаа л хурдан морь унаж уралддаг байлаа шүү дээ. Зургаан, долоон жил унаач явсан. Гэхдээ морь мал уяж сүйд болсон юмгүй ээ. Ажил алба гээд тэр бүр амждаггүй байлаа. Харин ирэх жилээс морь уяна гэж бодож байна.
-Танд амжилт хүсье. Ярилцсанд баярлалаа.
-"Тод магнай" сэтгүүлийн хамт олонд баярлалаа.
"Тод магнай" сэтгүүл Хэнтий аймгийн тусгай дугаар