Уралдаанч О.Түвшинбаяр: Ангийнхандаа морио айрагдуулсан тухайгаа ярих надад бахархалтай санагддаг

Орхон аймгийн Баян-Өндөр сумын харьяат, уралдаанч Отгонбаярын Түвшинбаяр хүүгийн ярилцлагыг уншигч танаа хүргэж байна.
-Хэзээнээс хурдан морь унаж байгаа юм бэ?
-Аавыгаа дагаж адуун дээрээ очсоор байгаад моринд сонирхолтой болж 2012 онд анх морь унаж сурсан. Тэгээд 2014 оноос уралдааны морь унаж анх хүрэн халзан  даагаа Ингэт сумын наадамд наймаар давхиулсан. Түүний дараа Баян-Өндөр сумын 20 жилийн ойд очоод 20 гаргаж давхиулсан. Өнөө жил 2015 онд хүрэн халзан үрээгээ унаж Бургалтайд болсон уралдаанд таваар давхиад, “Эрдэнэт хурд” хаврын уралдаанд халиун хязаалангаа унаж дөрвөөр давхиулсан.
-Аавтайгаа хамт олон газрын наадамд явж байв уу?
-Явсаан. Гэхдээ улсын наадамд очиж байгаагүй, бүсийн наадамд бол хэд хэдэн удаа явсан. Энэ зун Булган аймагт болсон хангайн бүсийн уралдаанд хүрэн халзан үрээгээ унаж хорь гаргаж давхиулсан. Бас шарга азаргаа унасан.
-Бүсийн уралдаан хэр санагдав?
-Их зохион байгуулалт сайтай гоё. Дээр нь өндөр чансаатай морьд ирж уралддаг юм билээ. Азарганд гэхэд манай эндхийн Батбаяр ахын хул азарга, Пүрэвдорж ахын хар азарга мордож байна лээ.
-Наадмын урьд шөнө нойр хүрэх үү? Ер нь юу бодогддог юм бэ?
 -Морь унах гоё ш дээ. Уралдахын өмнөх орой бол морио түрүүлгэчих юмсан, яавал сайн давхиулах вэ гээд зөндөө л юм бодно доо. Харин яг уралдааны үеэр өнгөнд гарахыг хичээнэ. Тэгээд зугуухан амыг нь дарж яваад үзүүр дээр нь сайн шахаад айрагдуулахыг хичээдэг дээ. Ер нь морь унаж байхад түүнээс өөр зүйл бодогддоггүй.Санасандаа хүрч морио түрүүлгэж, айрагдуулах чинь хамгийн сайхан аз жаргал. 
 -Тийм шүү?
-Морь унахад хийморь сэргэнэ, сэргэлэн цовоо болно. Өөдрөг болноо л гэсэн үг.
-Танай ангид морь унадаг хэр олон байна вэ?
-Манай сургууль 200 гаруй хүүхэдтэй. Тэдэн дунд би л ганцаараа морь унадаг. Тэгээд ангийнхандаа морь айрагдуулсан тухайгаа ярих надад бахархалтай санагддаг. Хүүхдүүд ч морь унах талаар их сонирхож асууна.
-Түвшинбаярын нэртэй  морь бий юу?
-Байгаа, аав маань анх намайг морь сонирхож эхлэхэд шарга үрээ бэлэглэсэн. Тэр нь одоо азарга болчихсон. Наран шарга гэдэг нэртэй. Би азаргаа унаж хурдлуулдаг юм. Наран шарга маань бүсийн наадамд хоёр удаа айрагдсан, аймгийн хэмжээний уралдаанд хоёр гурав ч орсон. Энэ жилээс анхны төлүүд нь гарсан. Ирэх жилээс сургаад унана даа. /инээв/
-Хүүхдээр хурдан морь унуулахгүй байх тухай асуудал яригддаг. Хэрвээ тийм шийдвэр гарвал чамд ямар санагдах вэ?
-Би их гутарна. Муухай шүү дээ. Монголчууд чинь эрт дээр үеэсээ морио унадаг байсан. Хүмүүс морин дээр даардаг гэдэг. Тэр ёстой худлаа. Харин ч халууцдаг.
-Том болоод ямар мэргэжилтэй болох вэ?
-Барилгын инженер болно. Гэхдээ хажуугаар нь морио уяна.
-Мөрөөдлөө биелүүлж мундаг уяач болоорой. Амжилт хүсье.
"Тод магнай" сэтгүүл Орхон аймгийн тусгай дугаар