Ц.Энхтайван төрийн зарлигт наадмаас нэг түрүү, дөрвөн айраг хүртээд байна

Монгол адууг дэлхийн дээд амжилтанд бүртгүүлэх түүхэн уралдаанд хонгор халзан морио түрүүлгэж, дэлхийд данслагдсан Баянхонгор аймгийн Баян-Овоо сумын уугуул, аймгийн Алдарт уяач Цэндийн Энхтайван өнөө жил төрийнхөө их  баяр наадамд хүрэн хязаалан айргийн дөрөвт хурдлуулсан.
2009 онд Ламын Гэгээн Лувсанданзанжанцаны мэлмий гийсний 370 жилийн ой хангайн бүсийн уралдаанд саарал шүдлэн айргийн таваар давхиулж томоохон наадмын өм нээж байсан тэрээр 2013 оны улсын баяр наадамд хонгор халзан морио аман хүзүүнд хурдлуулан давхар уяагаар шигшмэл морьдын “Их хурд-6” уралдаанд айргийн гуравт давхиулж байсан билээ. Улмаар хэдхэн хоногийн дараа болсон 4249 хүлгийн уралдаанд хонгор халзан морио түрүүлгэж, морьтон монголчуудыг дэлхий дахинд тунхагласан юм. Ийнхүү хонгор халзан морь “Дүнжингаравын хурд-2013” хаврын бүсийн уралдаанаас эхлээд тухайн жилийн хамгийн өндөр чансаатай дөрвөн том уралдаанд оролцон, нэг түрүү, хоёр айраг хүртэж, эзэн хүнээ алдаршуулсан билээ.
Ц.Энхтайван уяач хонгор халзан мориныхоо амжилтын буухиаг хээр үрээгээрээ үргэлжлүүлэн 2014 онд Ламын Гэгээн Лувсанданзанжанцаны мэлмий гийсний 375 жилийн ой говийн бүсийн уралдаанд айргийн гуравт хурдуулж байсан бол өнөө жил ийнхүү хүрэн үрээгээ айрагдууллаа.
А.Энхжил