Уяач Д.Нацагдорж: 2015 онд амжилт арвин наадаж, шилдэг уяачаар шалгарсан

Увс аймгийн Ховд сумын уугуул, Орхон аймгийн Баян-Өндөр сумын харьяат, уяач Дэмбэрэлийн Нацагдоржтой хийсэн ярилцлагыг уншигч танаа хүргэж байна. 
-Хэзээнээс хурдан хүлгийн уяа тааруулж, хурд ирлэж байгаа билээ?
-2004 оноос морь уяж байна. Тухайн үед “Тод магнай” гал маань байгуулагдаагүй байсан л даа. Би өөрөө Увс аймгийн Ховд сумын хүн. 1988 онд нутгаасаа гараад Сэлэнгэ аймгийн Орхонтуул суманд ирж, тэнд адуу маллан амьдарч байгаад 2003 онд Эрдэнэтэд шилжиж ирсэн юм. Тэгээд л 2004 оноос морь уяж эхэлсэн дээ.
-Анх унаган морио уясан уу?
-Намайг оюутан болоход манайхан гэр бүлээрээ Сэлэнгийн Орхонтуулд шилжиж ирсэн юм. Тэнд байхдаа анх өөрийн унаган адуунуудаасаа уясан. Дараа нь гэр бүлтэй болоод хадмынхаа адуунаас уясан. Манай хадам аав Коля гэж адуу сайтай хүн байдаг юм. Тэдний адуу Жаргалант угшилтай. Орхонтуул хавьдаа тэдний адуу сайн давхина шүү.
-Тэгвэл анхныхаа айргийг хэдэн оны ямар наадмаас авч байсан бэ?
- Нутагтаа байхдаа наймдугаар анги төгссөн жилээ даага уяж, сумынхаа наадамд айрагдуулж байсан. Түүний дараа 2007 онд Орхон аймгийн баяр наадмаас айраг авч байсан юм байна.
-Ингэхэд уяаны эрдмийн А үсэг заасан хүн чинь хэн бэ?
-Миний аав адуучин хүн. Би удам дагасан адуучин гэх үү дээ. Ах маань эмнэг хангал сургахдаа гаргуун байсан. Харин миний хувьд тийм ч олныг сургаж байгаагүй ээ. Нэг жил тав, зургаа дээд тал нь арвыг л  сургадаг байсан.
-Одоо ямар хүмүүсийн морийг уядаг юм бэ?
-2006 оноос хойш Баярцогт захирлын морийг уяж байгаад өнгөрсөн жилээс эхлээд Даваасамбуу захирлын морьдыг уяж байна. Би нэг их олон хүний морийг уядаггүй. Өнгөрсөн жил Даваасамбуу  захирлын хээр үрээг уяж дөрөв түрүүлгэж, хоёр аман хүзүүдүүлсэн.
-Хаашаа хаашаа явж наадаж байсан бэ?
-Ховд аймагт болсон баруун бүсийн уралдаанд явж байсан. Бас Завханд болсон хангайн бүсийн уралдаанд шүдлэн үрээ гурваар давхиулсан.
-Амжилт арвин наадсан нь хэдэн он бэ?
-2007 онд шүдлэн, соёолон дөрвөөр давхиулж, азарга тавд оруулсан. Өнгөрсөн 2014 онд Эрдэнэтийн наадамд хязаалан түрүүлгээд, даага аман хүзүүдүүлсэн. Ховдод болсон баруун бүсийн уралдаанд соёолон зургаалуулж, даага наймаар давхиулсан. Дорнодод болсон зүүн бүсийн уралдаанд азарга аман хүзүүдсэн. Энэхүү амжилтаараа аймгийнхаа есөн шилдэг уяачийн нэг болсон.
-Тэгвэл өнөө жилийн хувьд хэрхэн наадсан бэ?
-Хавар соёолон, хязаалан түрүүлгэж,  шүдлэн айрагдуулсан. Мөн Булганд даага, хязаалан аман хүзүүдүүлсэн.
-2016 ондоо амжилт арвин сайхан наадаарай. Бидний урилгыг хүлээн авч ярилцсанд баярлалаа.
"Тод магнай" сэтгүүл Орхон аймгийн тусгай дугаар