Сумын Алдарт уяач Ч.Амарсанаа: Арван жилийн дараа анхны айргаа амссан

Сүхбаатар аймгийн Уулбаян сумын уугуул, сумын Алдарт уяач Ч.Амарсанаагийн ярилцлагыг уншигч танаа хүргэж байна.
-Удам дамжсан уяач гэсэн. Тэгэхээр өвгөдийнхөө талаар яриагаа эхлэх нь зүйтэй байх?
-Миний аав Чалхаасүрэн хурдан хээр морьтой сумын Алдарт уяач цолтой хүн байсан. Аавын маань нэртэй бас нэг саарал азарга байсан. Ер нь манайх адуу олонтой айл байлаа. Миний санахын тухайн үедээ л сумандаа адууны тоогоор тэргүүлдэг байсан юмдаг. Тэр олон дунд манай сумын зартай хурд гэгддэг Хүүхэн Шүүлэнгийн хээр, Босоо гээд угшлуудын цөм бий гэж аав минь ярьдаг байсан.
-Аавын үлдээсэн буянгууд хэр хурдалж байна даа?
-Би 1994 оноос эхлэн морь уяж байгаа. Анхандаа ч хойхнуур л давхидаг байсан. Тэгж байгаад 10 жил хүлээсний эцэст 2005 онд Түмэнцогт сумын наадамд азарга, соёолон түрүүлгэн дээлэндээ багтахгүй хөөрч явлаа. Түүний дараа Баяндэлгэр сумын 80 жилийн ойд азарга түрүүлгэн соёолонгоо зургаалуулсан.
-Их хүлээлт талаар болоогүй л юм байна?
-Тиймээ. 2006 оны хаврын бооцоот уралдаанд азаргаа түрүүлгэн, 2007 онд Уулбаян сумынхаа наадамд хонгор азаргаа гуравлуулсан. Мөн 2011 онд аймгийн Аварга  хүлэг шалгаруулах уралдаанд буурал соёолон дөрөвт давхиулж, “Дархан ханы хурд-2012” уралдаанд хүрэн халзан азаргаа аман хүзүүдүүлж байлаа. Харин энэ жилийн тухайд 3-р сарын 18-нд Мөнххаанд болсон уралдаанд хээр азаргаа түрүүлгэж, хүрэн морио тавлуулсан. Одоогоор сумын баяр наадмаас гурван түрүү, 5-6 айрагтай.
-Сүхбаатарын уяачдын амжиргааны нэгэн үүсвэр нь хурдан морины арилжаа болоод байгаа. Амарсанаа Алдарт адууны наймаа хэр хийж байна?
-Гадагшаа гарах нь гарсан. Гэхдээ олон бишээ. Цагаанбандийн Буянбаатар гэдэг залууд халзан азарга очсон энэ жилээс уралдах байх. Мөн Зүүнхараагийн “Спирт бал бурам” ХК-ийн орлогч даргад хонгор даага очсон. Ноднин гэхэд л хоёр орчихсон дуулдана лээ. Өнгөрсөн жилийн улсын наадамд найз Цог-Эрдэнэ маань хязаалан үрээ аваачиж 27-д давхиулсан.
-Танайхнаас өөр морь уядаг хүн бий юу?
-Манайх долоон бандитай. Тэднээс хоёр нь морь уядаг. Би айлын ууган хүү нь байгаа юм. Манай хүүхдүүд ч моринд дуртай. Хожмоо уях байхаа.
-Буурлын буяныг залгамжлуулж хурд ирлэж яваа танай гэр бүлд сайн сайхныг хүсье. Ярилцсанд баярлалаа.
-Баярлалаа. Та бүхэнд ажлын амжилт хүсье.

"Тод магнай" сэтгүүл Сүхбаатар аймгийн тусгай дугаар