Аймгийн Алдарт уяач Д.Ганзориг: Улс, бүсийн наадмаас нэг түрүү, таван айраг хүртэн сайхан наадлаа

А.Тэлмэн
2016 оны 10-р сарын 18 -нд

АХ-95 жилийн ой, Үндэсний их баяр цэнгэл наадмын хурдан соёолонгийн уралдаанд зээрд халзан үрээгээ айргийн дөрөвт хурдлуулсан Төв аймгийн Алтанбулаг сумын уугуул, аймгийн Алдарт уяач Дугаржавын Ганзоригийн баярын сэтгэгдлийг уншигч танаа хүргэж байна.
-Төр түмнийхээ их цэнгэл наадамд аз хийморийн бэлгэдэл болсон соёолон айрагдуулсан танд баяр хүргэе. Баяр наадмынхаа сэтгэгдлээс хуваалцахгүй юу?

-За баярлалаа. 2007 онд АХ-ын 86 жилийн ойн баяр наадмаар хээр соёолон аман хүзүүнд хурдлуулж байснаас хойш есөн жил төрийн наадмаас хишиг хүртээгүй байсан юм. Өнөө жил халзан соёолон маань айргийн дөрөвт хурдалж, төрийн наадмын хоёр дахь айргийг авчирлаа. Маш их баяртай байна.
-Улсын наадмаас гадна бусад уралдаанаас айраг, түрүү авч л байсан байлгүй дээ. Жишээлбэл бүсийн...?
-Жил бүр морио уяж, мордуулж л байсан. Гэхдээ бүсийн чанартай уралдаануудад түрүүлж, айрагдаагүй ээ.
-Тэгвэл зээрд халзан амжилтын өмийг нээжээ дээ?
-Тиймээ, манай галынхан бүгдээрээ тэгж бэлгэшээж байгаа.Улсын баяр наадмаас хойш манай галынхан амжилттай наадаж, зүүн бүсийн уралдаанаас нэг түрүү, дөрвөн айраг авсан бол Хүрээ цам даншиг наадамд хээр морио дөрөвт давхиулж айрагдуулсан.
-Улсын баяр наадамд хэдэн насны морь мордуулсан бэ?
-Нас насны л морь мордуулсан даа. Хязаалан  хонгор үрээ маань 14-өөр, бусад нь бариатай давхисаан.
-Зээрд халзангийн тухайд наадмын өмнөх сунгаанд хэр байсан бэ?
-Манайх  Багахангайд сунгаагаа хийсэн. Ер нь наадмын өмнө халзан үрээ маань их сайн байсан шүү. Сунгаа болгон дээр л өнгөнд давхиж байсан болохоор улсын наадамд айрагдчих болов уу гэсэн итгэл  байсан. Тэр ёсоор боллоо. Зээрд халзан маань өнгөрсөн жил тав уралдахдаа дөрөвт нь түрүүлж, нэгд нь  аман хүзүүдсэн.
-Та хэзээ авсан билээ?
-Энэ хавар Дүнжингараваас 20-иод хоногийн өмнө авсан.
-Зүүн бүсийн уралдаанд хэдэн насны морьтой очсон бэ?
-Нас болгоны адуутай явсаан. 200 гаруй соёолон уралдахад зээрд халзан соёолон маань сайхан хол түрүүлж, 300 гаруй морьдоос шар хээр маань аман хүзүүнд хурдалсан.
-Хээр морь хаанахын адуу билээ?
-Шар хээр морь маань Сүхбаатар аймгийн Баруун-Урт сумын харьяат Сүхбатын Адъяагийн унаган адуу. Сүхбаатар сумын наадамд аман хүзүүдсэнийх нь дараа авсан юм.
-Соёолон түрүүлж, их нас аман хүзүүдсэн. Бусад нас яаж давхив?
-Шүдлэн насанд хээр алаг үрээ аман хүзүүдэж, эрлийз бага нас буюу дааганд хоёр үрээ аман хүзүү, айргийн таваар тус тус давхилаа.Өнөө жилийн зүүн бүсийн уралдаан зохион байгуулалт сайтай, сайхан болсон.
-Улс, бүсийн наадмаас нийт хичнээн айраг, түрүүтэй болоод байгаа вэ?
-Долоон айраг, түрүүтэй болоод байна. Энэхүү амжилт маань манай галын уяач, аймгийн Алдарт  Батмөнхийн Батхүүтэй салшгүй холбоотой. Мэдрэмжтэй үнэхээр сайн уяач.
-Сумынхаа 80 жилийн ойн баяр наадамд оролцсон байх. Ямар амжилт үзүүлсэн бэ?
-Хязаалан түрүүлгэж, эрлийз дунд насны ангилалд нэг үрээ айрагдууллаа. Мөн их насны морь зургаад хурдалсан.
-“Оргиоч” галынхан одтой нааджээ. Гал уяаныхнаа танилцуулаач?
- Дугаржавын Ганзориг, Батмөнхийн Батхүү, Ганбаяр, Гансүх, Зоригт нарын бүрэлдэхүүнтэй. Манайхан хаврын уралдаанаас эхлээд л одтой сайхан наадацгаасан.
-Нэр нь их өвөрмөц юм...
-Манай суманд байдаг уулын нэр. Алтанбулагчууд хүндлэн дээдэлж явдаг хайрхнаараа гал уяагаа нэрийдсэн юм.
-Уул, ус хангай дэлхийдээ ивээгдэн одтой сайхан наадаарай. Амжилт хүсье.
-Баярлалаа.
А.Энхжил

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна