ХАКУХО ЗЭЭРД

Тэртээ 36 жилийн өмнө  АХ-ын 59 жилийн ойгоор Төв аймгийн Эрдэнэсант сумын уугуул, Дархан Аварга Жигжидийн Мөнхбат монгол төрийн наадамд хүрэн соёолонгоо түрүүлгэж байсныг морь сонирхогч эрхэм уншигч та бүхэн санаж буй бизээ. Төв аймгийн Баянцагаан сумын уугуул, Монгол улсын Алдарт уяач Мөржавын Тожил агсны бэлэглэсэн хурдан хүрэн азарга ийнхүү Дархан аваргад төрийн наадмын түрүүг авчирсан бөгөөд хожмоо М.Данзаннямын Ажнай хүрэн нэрээр гурав түрүүлэн, нэг айрагдаж 20-р зууны манлай хүлгээр тодорч байсан билээ.
Энэхүү бахдам түүхийн үргэлжлэл болж, арлын Япон орныг эр чадал, бяр тэнхээгээрээ байлдан дагуулж буй мэргэжлийн сумогийн 69 дэх Их аварга Хакухо М.Даваажаргалын сартай зээрд морь АХ-ын 95 жилийн ой үндэсний их баяр цэнгэл наадамд айргийн гуравт хурдлан түмэн олноо баясгалаа.
Зээрд морь Төв аймгийн Сэргэлэн сумын харьяат, Тод манлай уяач Д.Ононгийн унаган адуу. Хязаалан ахуйд  нь “сайн их насны морь болно” хэмээн шинжиж байсан Тод манлайн амны бэлгэ ашдын ерөөл болж зээрд морь соёолондоо АХ-ын 93 жилийн ойд аман хүзүүнд хурдалж  морь сонирхогчдын танил болсон билээ. 2015 онд Хөдөлмөрийн баатрын мялаалга болж очсон зээрд морины удам, угшил, амжилтын товчооныг сийрүүлбэл:
Удам, угшил:
Эцэг: 2003 онд шүдлэндээ аман хүзүүдэж, 2004 онд хязааландаа түрүүлж байсан Д.Ононгийн унаган Ц.Энхбаярын нэртэй хамар цагаан зээрд азарга. Зээрд азарга давхар уяагаар Алтан-Овооны тахилга, зүүн бүсийн наадамд түрүүлж байсан.
Эх: Тогоруу угшилтай зээрд гүү.
Амжилтын товчоон:
2013 онд хязаалан:
АХ-ын 92 жилийн ой, үндэсний их баяр наадамд 13
Төв аймгийн 90 жилийн ой төвийн бүсийн уралдаанд арав гаргаж давхисан
2014 онд соёолон:
АХ-ын 93 жилийн ой, үндэсний их баяр наадамд аман хүзүү
2015 онд хавчиг:
АХ-ын 94 жилийн ойд өнгөнд уралдаж байгаад татуулсан
Хакухо аваргын Хөдөлмөрийн баатар цолны мялаалга наадамд түрүү
ММСУХ-ны 20 жилийн ойд арав гаргаж давхисан
2016 онд долоотой:
“Дүнжингаравын хурд-2016” хаврын бүсийн уралдаанд айргийн гурав
АХ-ын 95 жилийн ой үндэсний их баяр наадамд айргийн гурав
Шигшмэл морьдын “Их хурд-7” уралдаанд айргийн дөрөв
А.Энхжил