Санжаабүрэгийн цавьдар

Улсын их наадамд гурав түрүүлж, дөрөв айрагдсан адуу тун цөөхний нэг нь Санжаабүрэгийн цавьдар азарга юм. Энэ азарга анх АрдынХувьсгалын 23 жилийн ойгоор хязаалан насандаа улсын их баяр наадамд гуравт давхиад дөрвөн жилийн дараа мөн улсын их наадамд найман насандаа түрүүлээд, есөн насандаа аман хүзүүлээд, арван насандаа түрүүлээд, 11 насандаа гуравт давхиад, 12 насандаа түрүүлээд, 13 насандаа дөрөвт давхиад, 14 насандаа хөл муутай болжээ.
Нэрт уяач Падын Янзаганы адуунд Нацагдорж гэдэг хүний их дэлтэй цавьдар үрээ нийлээд гурав хоножээ. Пад түүнийг шинжээд хурдныг нь таньж Санжаабүрэгт “Чи энэ үрээг ав! Лав хурдан” гэсэнд Санжаабүрэг үгэнд нь орж худалдан авсан юм гэдэг. Цавьдар азарга Баянцагааны Нэрэнжимээгийн адууны удам юм.
Авдарбаян суманд эдгээрээс гадна Сүрэнхиа, Лувсанбалдан, Базарваань, Дамбаа, Чулуун зэрэг сайн уяачид байжээ.

А.Баярмагнай