МУ-ын Алдарт уяач Т.Болдбаатар: Өглөө халиун азарга өнгө зүс жигдрээд цаанаа л нэг жавхаатай мордсон

АХ-ын 95 жилийн ойн баяр наадамд адуун сүргийн манлай азарганы уралдаанд газар газраас ирсэн хурдан 177 азарга шандас шалган уралдсан. Улсын Алдарт уяач Т.Болдбаатарын Магнай халиун азарга тод магнай торгон жолоо өргүүлж наадамчин олноо цэнгүүллээ.

-Төрийн их баяр наадамдаа Магнай халиун азарга магнайдаа тоосгүй түрүүлж наадамчин олноо баясгалаа. Баярын сэтгэгдэл манай уншигчтай хуваалцахгүй юу?
- АХ-ын 95 жилийн ойн баяр наадамд адуун сүргийн манлай азарганы уралдаанд халиун азарга маань амжилттай сайхан уралдан газар газраас ирсэн хурдан буянгуудтай хүч бяраа сорин уралдаж аргагүй дийлж түрүүллээ. Өвлөөс уралдааны бэлтгэл хангаж эхэлсэн Дүнжингаравын хурд уралдаанд зургаад давхисан. Уяа засал бэлтгэлээ Сүхбаатар аймагт хийсэн. Сүүлийн долоо хоног Жаргалантын аманд мориныхоо нарийн заслыг хийсэн. Аймгийн Алдарт уяач Э.Мөнх-Эрдэнэ халиун азаргыг олон жил уясан болохоор уяаны арга барилыг нь мэддэг. Тийм ч учраас сая төрийн баяр наадамдаа түрүү магнайд хурдаллаа. Сэтгэгдэл их өндөр байна. Хойморь нутгийн хоёр хурдан азарга төрийн их баяр наадамд айргийн тавд, эхний арав дотор дөрвөн азарга хурдалж байна. Манай Хөвсгөл аймгийн хийморь лундаа сайн байна. Эхний аравт дөрвөн азарга орчихлоо. УИХ-ын гишүүн Л.Мөнхбаатарын бор азарга, мөн улсын Алдарт уяач Г.Доржпүрэв гуайн хүрэн азарга, аймгийн Алдарт уяач Д.Энхтөрийн хул азарга айргийн тавд хурдаллаа. Хөвсгөл аймгийн “Дэлтэй цэнхэр” уяачдын холбооны бодлого, хөдөлмөр талаар болсонгүй жилээс жилд манай уяачдын ур чавдар сайжирч, уралдах хүлгүүд нь байр урагшилж байна. Хөвсгөлчүүддээ болон нийт уяачиддаа АХ-ын 95 жилийн ойн баяр наадамдаа сайхан наадаарай, морь нь хурдан бөхчүүд нь бяртай байж улсын наадмын зүлэг ногоон дэвжээнд сайхан барилдаж үзүүр түрүү булаалдах болтугай. 

- Халиун азаргаа түрүүлнэ гэдэгт хэр итгэлтэй байв уу?
- Өглөө халиун азаргаа харахад өнгө зүс жигдрээд цаанаа л нэг жавхаатай мордсон. Түрүүлнэ гэх нь хаашаа юм, харин айрадчихаасай гэж тэнгэр хангай, лус савдагтаа залбирч байлаа. Манай Хөвсгөл аймгийн Мөрөн сум хар морьтын сахиустай. Сүүлийн үед манай морьд хурдлах болсон нь жил бүр сахиус, хурдан морины Дамдин янсан бурханаа зуны эхэн сарын шинийн найманд тахидаг уламжлалтай холбоотой. Үүний үрээр уяачдын маань хийморь золбоо сэргэн, уяаны эрдэм ухаан нь жилээс жилд сайжирч байна.

- Алдарт улсны баяр наадамдаа хэдэн морьтой ирэв?
- Хоёр морьтой ирсэн. Өчигдөр шүдлэн 16-аар ирж Магнай халиун азарга сайхан түрүүллээ. Халиун азарганы уралдаан 24-нд Их хурдад үргэлжлэх болно. Харин их хурдын дараа аль нэг бүсийн наадамд явна.

- Ярилцсанд баярлалаа.
- Баярлалаа.

А.Энхжил