Хүндэт харваач, Алдарт уяач Пэрэнлэйн Төмөрбаатар

Залуу үеийг халамжлан хүмүүжүүлэгч, осолгүй манлай жолооч, системийн Аварга, МУ-ын хүндэт харваач, сумын Алдарт уяач Пэрэнлэйн Төмөрбаатарыг уншигч танаа танилцуулж байна. Тэрээр 1954 онд Говьсүмбэр аймгийн Сүмбэр сумын нутаг Эрдэнэ ус хэмээх газар төрж, 1962 онд 8-н жилийн дунд сургуулийг төгсөөд 1978 оныг хүртэл Чойрын ахуйн үйлчилгээнд нормчноор ажиллажээ. Улмаар 1978 онд Улаанбаатар хотын авто сургуульд элсч нэг жил суралцаад түүнээс хойш 44 жил моторт хүлгийн жолоо мушгисан Осолгүй манлай жолооч юм.
Харин морь уях тухайд бол тэрээр удам дамжсан уяач. Түүний аав Доогийн Пэрэнлэй Дундговь аймгийн Их эрээн сумын, Боржигон хүн юм. Таван настай бяцхан жаал ааваараа морь унахыг заалган хурдан хүлгийн нуруун дээр мордож байсан гэдэг. Д.Пэрэнлэйн адуу Галшар угшилтай. Хар халзан азарга, хонгор морь, халиун морьд нь гоц хурдалж , нутаг хошууны наадамд түрүүлж, айрагдан уясан Д.Пэрэнлэй, унасан Төмөрбаатар нарын магнайг тэнийлгэсэн нь цөөнгүй. Ийнхүү багаас аавыгаа даган хүлэг эрдэнийн хийморьт сүсэглэсэн П.Төмөрбаатар 1970 оноос эхлэн сум, орон нутгийн чанартай наадамд хүн дагаж морь уяж байгаад гэр бүлтэй болсон хойноо хадам аав Сампилаасаа  морь уях талаар нэлээд суралцжээ. /Сампил уяач 1992 онд Сүмбэр сумын наадамд зургаан насны морь уяж таван айраг хүртэн, нэгийг нь зургаагаар оруулж байсан бас чиг эрдэмтэй нэгэн юм./
1985 оноос бие даан уяа эвлүүлж, 1986 онд Баруун-Өвөрт болсон наадамд хүрэн халзан соёолон түрүүлгэж, халиун морио аман хүзүүнд хурдлуулан, хүрэн даага айргийн гурваар давхиулан амжилтын гараагаа эхэлж байжээ. Түүний дараа жил буюу 1987 онд хүрэн шүдлэн түрүүлгэж, шарга шүдлэн айргийн тавд давхиулсан бол 1990-ээд оноос хойш халиун, халзан морьд, зээрд азарга, хүрэн үрээгээрээ урамтай сайхан наадсан байдаг. Мөн тэрээр адууныхаа удам  угшлыг сайжруулахын тулд Хэнтий аймгийн Дархан, Сүхбаатар аймгийн Уулбаян, Дорноговь аймгийн Дэлгэрэх, Иххэт зэрэг сумдаас азарган үрээ, гүү авч байсан гэдэг.
АМЖИЛТЫН ТОВЧООН
1984 он  Сүмбэр сумын өвлийн уралдаанд буурал морь гуравт
               Сүмбэр сумын наадамд буурал морь дөрөвт
1985 он  Сүмбэр сумын наадамд буурал морь тавд
1986 он  Сүмбэр сумын наадамд хязаалан зээрд халзан морь түрүү
               Сүмбэр сумын наадамд хүрэн даага гуравт
1987 он  Сүмбэр сумын наадамд хүрэн шүдлэн түрүү
               Сүмбэр сумын наадамд зээрд шүдлэн дөрөвт
               Сүмбэр сумын наадамд шүдлэн хүрэн үрээ түрүү, соёолонд Мөлүү зээрд морь дөрөвт
1988 он  Сүмбэр сумын наадамд зээрд соёолон дөрөв
               Сүмбэр сумын наадамд зээрд даага гурав
1989 он  Сүмбэр сумын наадамд саарал азарга аман хүзүү
               Сумын сонгуулиар саарал азарга түрүү
1990 он  Сүмбэр сумын наадамд цавьдар соёолон тавд
1991 он  Сүмбэр сумын наадамд цавьдар азарга аман хүзүү
1992 он  Аймгийн анхны Боржигон наадамд цавьдар азарга зургаа
1998 он  Говьсүмбэр аймгийн Шивээговь сумын наадамд цавьдар азарга аман хүзүү
1999 он  Говьсүмбэр аймгийн Шивээговь сумын наадамд цавьдар азарга түрүү
2009 он  Дундговь аймгийн Угтаалцайдам сумын АХ-ын 89 жил, сум байгуулагдсаны
               85  жилийн ойн баяр наадамд зэгэл зүсмийн соёолон морь дөрөв
2013 он  Дундговь аймгийн Говь-Угтаал сум байгуулагдсаны 89 жилийн ойн баяр наадам, 
               Зүүн бүсийн зуны уралдаанд их насны цавьдар зүсмийн морь зургаа
               Хэнтий аймгийн Дархан сумын 90 жилийн ойн баяр наадамд их насны зээрд морь найм
2011 он  Дорноговь аймагт болсон говийн бүсийн Хутагтын хурд хаврын уралдаанд их насны зээрд морь зургаа
               Говьсүмбэр аймгийн баяр наадамд зээрд морь дөрөв
2014 он  Шинэ галын бооцоот уралдаанд зээрд морь түрүү
               Цагаан-Овооны тахилгат уралдаанд зээрд морь түрүү

"Тод магнай" сэтгүүл Говьсүмбэр аймгийн тусгай дугаар