Аймгийн Алдарт уяач Н.Пүрэвсайхан: Алтан-Овооны тахилгат гурван соёолон айрагдуулсан

Сүхбаатар аймгийн Асгат сумын уугуул, Дорнод аймгийн Булган сумын харьяат, аймгийн Алдарт уяач Н.Пүрэвсайхантай хийсэн ярилцлагыг уншигч танаа хүргэж байна.
-Төрийн тахилгат Алтан-Овооны наадамд соёолон морь айрагдуулна гэдэг уяач хүний хувьд мартагдашгүй мөч байсан байх. Тэр таны том наадмын анхны айраг уу?
-Тиймээ, анхны айраг. Төрийн тахилгатай болохоос өмнө хоёр морь айрагдуулж байсан. 1993 онд соёолон, тэрний өмнө анхны тахилгат нь халзан морио айрагдуулж байлаа. 
-Алтан-Овооны наадам танд ээлтэй байдаг юмаа даа?
-Нээрэн тийм байна. Ах нь  Сүхбаатар аймгийн Асгат сумын хүн. Алтан Дарь эхийн Овооны тахилга наадамд гурван соёолон айрагдуулсан байдаг юм. Тийм том наадамд соёолон айрагдуулна гэдэг хэн болгонд тохиогоод байхгүй аз завшаан байх шүү.
- 2004 оны тахилгат айрагддаг хар соёолонгийнхоо угшил гарвалыг сонирхуулаач?
-Миний унаган адуу.Эх нь Дарьгангын жижиг зээрд гаралтай, харин эцэг нь Сүхбаатар аймгийн Сүхбаатар сумын Тонгоон Жамъяаны адуу байгаа юм. Соёолондоо буюу 2004 онд аймгийн наадамд аман хүзүүдээд, Сүхбаатар сумын  80 жилийн ойд түүнээ баталсан. Жилд дөрөв уралдаад дөрөв айрагдсан адуу даа.
-Бага насандаа яаж давхиж байсан хүлэг вэ?
-Уягдаж байгаагүй. Бүр хонинд унадаг байсан гээд бод доо.
-Хонины морь бүсийн наадамд айрагдчихсан хэрэг үү?
-Уг нь удмаа дагавал хурдан гэдгийг нь мэдэж байсан ч уяа нь нэг л эвлэхгүй, чөмөг суухгүй байсан юм. Тэгж байгаад соёолондоо  уяа нь ороод тэгж давхисан. Хар үрээний ах нь даагандаа аймагт гуравлаад, шүдлэндээ бас гуравлаад, хязааландаа аман хүзүүдсэн. Удмаа дагавал аргагүй хурдан адуу л даа.
-Уяачийн бахдалыг хамгийн их мэдэрсэн наадмынхаа дурсамжаас хуваалцаач гэвэл?
-2003 онд аймгийн наадам юмуу даа. Тэр наадмаас би хоёр түрүү, гурван аман хүзүү, нийт  долоон айраг түрүү авсан. Тэр амжилтаараа  2004 оны аймгийн шилдэг уяач  болж байлаа. Тэр миний уяачийнхаа хувьд ид оргилж байсан юм уу даа. Гол нь тэр адуунууд ахынх нь унаган адуунууд байсан юм. Уяач хүнд унаган адуугаараа амжилттай наадах шиг сайхан юм хаа байхав. 
-“Дорнод -2009” бүсийн уралдаанд оролцсон л байлгүй. Ямар амжилт үзүүлсэн бэ? 
-Оролцолгүй яахав. Хязаалан гурвалж, шүдлэн тавласан.
-Ингэхэд хэдэн онд Алдарт вэ?
-2003 оны. Зургаан түрүү, 12 айргаар аймгийн Алдарт уяач болж байлаа.
-Морь хурдах байхдаа том довон дээр уралдъя гэж бодож байв уу?
-Санаа байвч сачий хүрэхгүй гэдэг болж улсын наадамд яваагүй. Энэ хавьдаа бол бишгүй л сайхан наадсан. Хүүхдүүд уралдана биз. Миний нэг хүү морь уядаг. Мөн хоёр ачийн маань нэг нь алтан хараацай нэг нь мөнгөн хараацай. Зургаа долоон наснаасаа эхэлж хурдан морь унасан. Тэд маань нэг юм дуулгах байлгүй дээ.
"Тод магнай" сэтгүүл Дорнод аймгийн тусгай дугаар