Орон орны морин тойруулга №2- Ирланд

Ирландын морин тойруулгууд олон талаараа Британыхтай адил. Энэ улсад нийт 26 ипподром буюу морин тойруулга байдгаас зөвхөн гурав нь л шулуун замын уралдаан явуулахад зориулагдсан, бусад нь стипль-чезд зориулагдсан. Ирландын хурдан морины уралдааны төв нь нийслэл Дублинээс 47 километрийн зайтай байдаг Каррэг юм. Каррэг гэдэг нь “давхиж буй адууны газар” гэсэн утгатай аж. Энд бүр эртний Кельтийн хаадын үед морьд уралддаг байсан бөгөөд Английн мэдэлд орж, колони болсноос хойш 1741 онд хамгийн анхны албан ёсны уралдаан болсон байдаг. Ирландчуудын өөрсдийн Гиней, Дерби, Сент-Лежерүүдээ бүгдийг нь Каррэгийн уралдаанаар ялагчаа тодруулдаг гэдгээрээ Британи болон бусад орнуудаас ялгаатай. Үүнээс гадна Каррэг нь 1760-аад онд байгуулагдсан Үндэсний Жокей Клубын төв нь юм.
Гэсэн хэдий ч Ирландын хамгийн алдартай уралдаан нь Каррэгт бус харин Голуз нэртэй боомт хотод явагддаг. Голузын анхны уралдаан 1869 онд зохион байгуулагдаж олны анхаарлын ихээхэн татсан бөгөөд яваандаа Ирландын хамгийн алдартай уралдаан болжээ. Энэ уралдааныг үзэх гэж ирсэн хүмүүс өмссөн зүүснээрээ гайхуулж, хэн хамийн сайхан хувцас, малгай, цүнхтэй ирж вэ хэмээн сонирхдог болж, тэр талаар нь сонин хэвлэл дээр бичдэг уламжлал тогтжээ. Мөн Голузын стипль-чейзийн сүүлийн хоёр саад нь барианы зураасны өмнөх хонхор дотор, өөрөө хаана ч байдаггүйгээр хоорондоо ойр байрласан гэдэг онцлогтой.
Дээрх хоёр морин тойруулга нэр алдартай ч гэлээ Ирландын хамгийн хуучин ипподром нь тэртээ 1685 онд анхны албан ёсны уралдаанаа зохион байгуулж байсан Даунпатрикийн морин тойруулга. Анхны уралдаан зохион байгуулагдаснаас таван жилийн дараа энд болсон уралдаанд цэвэр цусны англи адуу гэсэн шинэ үүлдрийн эхлэлийг тавигч азаргануудын нэг Бейерлей – Терк түрүүлж байсан төдийгүй уралдаанаас шууд эзний хамтаар хаан ширээний төлөөх тулаан руу явж байсан түүхтэй.
Б.Бадрал

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна