МУ-ын Алдарт уяач Намсрайн Даваа

Хөлөнбуйр сумаар овоглосон улсын цолтнуудын нэг нь Намсрайн Даваа юм. Гурав дахь үеийн уяач Н.Даваа 1923  онд Дорнод аймгийн хуучнаар Түмэндэлгэр сумын нутаг Нохойн хошуу хэмээх газар төржээ. Багаасаа хурдан морь унаж, мал хариулж өссөн тэрээр эр цэргийн албанд мордож Улаанбаатар хотын Улаанхуаран дахь танкийн хороонд алба хааж байхдаа 1945 оны чөлөөлөх дайнд оролцож явсан түүхтэй нэгэн. Н.Даваа нь 1970-аад оноос хурдан морь уяж эхэлсэн бөгөөд түүний уясан хүрэн халзан, алаг, хул зүсмийн азарганууд хээрь, хүрэн зүсмийн морьд аймаг сумынхаа наадмаас олон айраг түрүү хүртсэн цуутай хүлгүүд. Н.Даваа 30 гаруй жил хурдан хүлгийн уяа сойлгыг тааруулахдаа аймаг, бүсийн наадмаас 12  түрүү, 12 айраг, сумын наадмаас 20 гаруй түрүү, 30 гаруй айраг хүртэн 1999 онд МУ-ын Алдарт уяач цолны эзэн болсон байна. Тэрээр эцэг өвгөдөөс өвлөгдсөн морь уях сойх эрдмээ Ю.Гомбо, С.Батсайхан, Шагдарсүрэн, О.Гонгор, Б.Майдар, М.Мягмар, Д.Батболд  нарын нутгийн залуустаа өвлүүлж, мориор дамжсан үндэсний өв соёлоо түгээн дэлгэрүүлэх үйлсэд өөрийн хувь нэмрээ оруулсан билээ.Өдгөө  Алдартын  дүү Ю.Гомбо, Ю.Эрдэнэ, нутгийн дүү С.Батсайхан нар өвгөдийнхөө хурдан буяныг залгамжлан сайн уяж байгаа юм.
"Тод магнай" сэтгүүл Дорнод аймгийн тусгай дугаар