Аймгийн Алдарт уяач Д.Баатарсүрэн: 12 настайдаа анхны айргаа хүртэж байлаа

Өмнөговь аймгийн Хүрмэн сумын уугуул, аймгийн Алдарт уяач Д.Баатарсүрэнгийн ярицлагыг уншигч танаа хүргэж байна.
- Баатарсүрэн Алдарт сайхан намаржиж байна уу? Энэ жил хаагуур хаагуур наадав?
-Сайхан намаржиж байна. Энэ жил амралтаа авчихаад л сууна даа. Учир нь хавар газар жаахан муу байсан болохоор энэ жилдээ морьдоо амрааж өнжчихсөн юм.
- Уяач нартай уулзаж байхад ихэнх нь унаач хүүхэд явсан байдаг юм билээ.Таны хувьд?
-Монгол эр хүн бүрийн сэтгэл зүрхэнд морь ойрхон байдаг гэж үнэн байх шүү. Хүүхэд байхдаа л моринд дуртай жаалхүү явлаа. 12 настайгаасаа нутгийн ах нараа дагаж, морь уяж эхэлсэн. Одоо эргээд бодоход бас л балчир санагдаад байдаг юм. Тухайн үедээ өөртөө бол том эр ш дээ. Ингээд их нас, үрээгээ мордуулж, айргийн гурав, дөрвөөр давхиулан сумын наадмаас анхны айргаа хүртэж явлаа. Нутгийн хашир уяачидтай мөр зэрэгцэн, цулбуур өргүүлж зогсохдоо уяач болсон мэт л хөөрч байсан маань өчигдрийн мэт тодхон санагдаж байна. Энд сонирхуулахад миний ээжийн аав, нагац ах хоёр морь уядаг хүмүүс байсан. Тийм болохоор долоон настайгаасаа хурдны морь унаж, таван жилийн дараагаас уяж эхэлсэн.
- Түүнээс хойш хэчнээн айраг түрүү хүртээд байна. Хэдэн онд Алдарт боллоо?
- 12 настайдаа сумандаа морь айрагдуулчихаад хэсэг завсарлага авсан гэх үү дээ. Ажил амьдралын шаардлагаар хойш тавихаас өөр аргагүйд хүрсэн юм. Тэгж яваад 2003 оноос эргэж морио уяж эхлэсэн. Насаараа хусуур, сойз зүүж яваа хашир уяачидтай харьцуулахад моринд “шинэ хүн” гэж болно л доо. Гэхдээ энэ хугацаанд тавь гаруй  айраг, түрүү хүртсэн амжилтаараа 2009 онд Алдарт уяач цолыг хүртсэн. Эргэн морь уях болоод 2008 онд шүдлэн үрээ айрагдуулж, аймгаасаа анхны айргаа авсан нь бас л сэтгэл огшоосон наадмуудын нэг байгаа юм. Үүнээс нэг жилийн дараа аймгийн баяр наадамд шүдлэн үрээ түрүүлгэж, даага айргийн гурваар давхиулж одтой наадаж билээ.
- Өвөө, ахынхаа тухай дэлгэрүүлээч. Ямар ямар амжилт үзүүлж байсан бэ?
-Миний өвөөг Дэмид, нагац ахыг Додон гэдэг. Тухайн үедээ нутаг орондоо нэртэй уяачид явлаа. Айраг түрүү алддаггүй, хул хонгор зүсмийн олон адуутай улс байсан.   
- Мэдээж танд өвлөгдөн ирсэн байх даа?
-Тэгэлгүй яахав. Өвөөгийн адуунууд надад ирсэнээс одоо ганц нэг нь л үлдэж дээ. Миний өвөөгийн адууны угшилтай хамгийн анхны айраг хүртсэн шүдлэн хүрэн үрээ надад их ч олон айраг түрүүг авчирсан, буянтай амьтан байгаа юм. Дээрээс нь Бадамсүрэн ахын маань Хэнтий, Төв аймгийн угшилтай адуунууд надад бий.  Сүүлийн жилүүдэд адууныхаа цусыг сайжруулах ажил эрчтэй хийж байна.
- Ярилцсанд баярлалаа.
"Тод магнай" сэтгүүл Өмнөговь аймгийн тусгай дугаар