Сэтгүүлийн шинэ дугаар худалдаанд гарлаа

Сар саатан хүлээсэн уншигчдынхаа гарт  «Тод магнай» сэтгүүлийн  шинэхэн  дугаарыг хүргэж байгаадаа таатай байна.  74 дэх дугаарын зочны хойморноо Төв аймгийн Сэргэлэн сумын уугуул, Дорнод аймгийн Баянтүмэн сумын харьяат МУ-ын Манлай уяач Ононгийн Батбилэг уригдсан юм. Сүүлийн гурван жил дараалан МУ-ын чансаа өндөр есөн уяачийн нэгээр шалгарч, 2014, 2015 оны шилдгийн шилдэг уяачаар тодорсон түүний ярилцлагыг морь сонирхогчид битүүхэн хүлээж байсан бизээ. Анх гурван настай морины нуруун дээр гарч, долоон настай төрийн наадмын айргаа амссан тэрээр шаггүй уралдаанч байсан хэмээдэг. 1997 оноос уяачийн гараагаа эхэлж сүүлийн гуравхан жилийн хугацаанд улс, бүсийн чанартай наадмаас 10 түрүү, 41 айраг хүртэн МУ-ын Манлай уяачаар эрэмбэлэгдсэн хийморилог залуу эрхмийн дэлгэрэнгүй ярилцлагыг  8-17-р нүүрнээс уншиж болох юм.
Хэдэн жилийн өмнө манайхан хэвлэлийн хуудаснаас дэлхийн тэргүүлэх адуу үржүүлгийн газруудын нэг Күүлмоорийн шилдэг азарганууд Америк, Австрали, Ирланд дахь жүчээнүүдийн хооронд тив алгасан хувийн онгоц хөлөглөн нисдэг. Зөвхөн гүү гишгэх үүрэгтэй тэднийг үржүүлгэнд орох бүрт нь Күүлмоорийн данс ихээр зузаардаг бөгөөд жилдээ 250 гаруй сая фунт стерлингийн орлоготой ажилладаг тухай уншиж байсан цаг саяхан. Тэгвэл Монголд энэ ажлыг эхлүүлээд байгаа малын их эмч А.Наранбаатарын ярилцлага  сонирхолтой байх болов уу. Ирландад очиж туршлага судлаад ирсэн түүнтэй зөвхөн үржүүлгийн талаар ярьсангүй. Адууны өвчин, хөлийн бэртэл гэмтэл, малын эм гээд уяач, малчдад хэрэгтэй олон сэдвээр “Тод магнай”-н сурвалжлагч ярилцжээ.
 Мэдээж уламжлалт уралдаан буланд “Дарханханы хаврын уралдаан”, "Норовын хурд" МСУХ-ны нэрэмжит уралдаан,  “Нүүрэнтэй хурд” ,  “Орхон аймгийн хаврын уралдаан”-ы тус тус айраг, түрүүний хурдан хүлгүүдийн фото, уясан эзэн, унасан хүүхдийнхээ алдрын хамтаар бичигдсэн байна.
 Түүнчлэн “Цуутай хүлгийн аатай түүх”-ээр  “Илжиг саарал төрийн наадмын түрүү болсон нь” тухай өгүүлсэн бол “Аяны богц”  Их говийн эзэн хоёр бөхт Монгол тэмээ дэлхийд данслагдсан тухай газар дээр сурвалжилсанаа  багтаасан байна.  
 Уншигчдадаа дуулгах өөр нэгэн сонин бол “Ашигт” хурдан морины тэжээл юм. Энэ тухай “Ашигт фийд” ХХК-ийн зөвлөх, мал эмнэлгийн шинжлэх ухааны доктор З.Батсүхтэй ярилцсаныг 44-46-р нүүрээс уншиж болох юм.   Цааш өрнөдөд морь унаж турах фитнесс моодонд орж, Ахелтик үүлдрийн адууны баяраа Туркменчууд нижгэр тэмдэглэсэн аж. Энэ бүхний дэлгэрэнгүйг “Тод магнай” сэтгүүлээсээ шимтэн уншина бизээ.

“Тодмагнай” сэтгүүлийг  “Интер” номын дэлгүүр, сонин борлуулах цэгүүд болон Нарантуул захын замын урд байрлах “Сорлог сүрэг” эмийн бөөний худалдааны төв,  1-р хорооллын 32-р байрны урд өргөтгөлд "Түмэн сувд сүрэг" малын эмийн сан, Хархорины гүүрнээс хойш явсан замын баруун талд 25-р байрны өргөтгөлд "Шандаст хүлэг" дэлгүүр, “Драгон” авто вокзал дахь “Драгон” худалдааны төвийн хажуу дахь “Бүрэн ланс” эмийн  сангаас тус тус худалдан авч уншаарай.
Холбоо барих утас: 9401-2992, 9408-2992