Монгол улсын Алдарт уяач Холхооны Даш

1927 онд одоогийн Халх гол сумын нутаг Нөмрөгийн голын эрэгт Холхооны гуравдугаар хүү болон мэндэлсэн тэрээр бага насаа эцэг эхийн гар дээр мал маллан өнгөрүүлжээ. Улмаар 1950-иад оны үеэс эхлэн хурдан хүлгийн уяа тааруулах болсон бөгөөд өөрийн унаган бор морь, бор соёолон, хүрэн бор соёолон, ухаа азарга, Х.Мөнхийн Гүртэм хүрэн, хүү Ганбатын хүрэн, хүү Соёл-Эрдэнийн шарга шүдлэн, улаан соёолон  гэх зэрэг морьдоор сум,  бүс, аймгийн наадмуудаас олон олон айраг түрүү авч байсан юм. Жишээлбэл 1961 онд  Дорнод аймагт зохиогдсон  бүх сумдын спартикадын их насны морьдын уралдаанд  бор морь нь аман хүзүүдэж, хүрэн бор соёолон нь айрагдаж  байжээ. Мөн Гүртэм  хүрэн морь нь сумынхаа баяр наадамд гурав түрүүлж,/1966, 1967, 1968 онд/, гурав аман хүзүүдэн,   бүсийн спартикадад нэг  түрүүлсэн хурдан буян юм. Харин хурдан хул азарга арван жил /1981-1991 онд/уралдахдаа найм түрүүлж,  хоёр аман хүзүүдсэн нь ховорхон амжилтуудын нэгд тооцогдоно. Энэхүү амжилтуудыг нь үнэлж 1995 онд түүнд МУ-ын Алдарт уяач хэмээх эрхэм цолыг хүртээсэн бөгөөд өдгөө гарын шавь Түвдэнжаажидын Батзориг нь Монгол улсын шилдэг залуу уяачаар хоёр дахь удаагаа шалгарч, МУ-ын Алдарт уяач цол хүртэн нутгийн зон олноо баясгаж байна
"Тод магнай" сэтгүүл Дорнод аймгийн тусгай дугаар