Уралдаанч Д.Самбууням: Бүсийн наадам хүлэг, хүүхэд, уяач гурвын эрдмийг нь шалгадаг

Дорноговь аймгийн уралдаанч Д.Самбуунямын ярилцлагыг уншигч танаа хүргэж байна.
-Хэзээнээс хурдан морь унаж байгаа вэ?
-Зургаан настайгаасаа аавынхаа хээр морийг унадаг болсон. Хээр морио унаж аймгийн баярт таваар давхиулсан. Бас буурал үрээгээ унаж аймгийн наадамд дааганд нь гуравлуулж, шүдлэнд нь аман хүзүүдүүлсэн. Одоо соёолон үрээ бий. Мөн Банзрагч ахын хүрэн даагыг унаж сумынхаа 70 жилийн ойд түрүүлгэж, Баянхайрхан сумын сургуулийн 70 жилийн ойгоор аман хүзүүдүүлсэн. Буурал үрээ маань араас явж нэг, нэгээр нь идэж уралддаг болохоор би унах дуртай байдаг.
-Морь унаад хичнээн айраг түрүү хүртсэн бэ. Тоолж байсан уу?
-Аймаг, сум болон бусад наадмаас 20-иод түрүү, 30-аад айраг авсан байх.
-Танай гал олон унаачтай юу?
-“Айрагийн  шандас” гал маань хоёр жил сумын шилдгээр шалгарсан. Би өөрөө шилдэг унаачаар гурван жил дараалан шалгарч байна. Манай галд Очирпүрэв, Баасандорж, Доржбат гээд 4-5 хүүхэд бий. Би Доржбаттайгаа илүү найз. Өнгөрсөн жил зургаан настайгаасаа морь унаж эхэлсэн юм. Бас Баасандоржид морь унахыг зааж өгсөн.
-Өөрөө арай ахмад нь юмаа даа?
-Тиймээ. Есөн жил хурдан морь унаж байна. Би сумынхаа шигшмэл морьдыг унадаг. Хүмүүс надаар морио унуулах дуртай байдаг юм. Манай аав сумын Алдарт уяач. Аавынхаа морийг бас унана.
-Хамгийн сайхан наадам хэзээ байв?
-Хамгийн гоё нь аймгийн наадам байдаг юм. Бас сургуулийн 70 жилийн ойгоор өөрийн унаган хүрэн даагаа түрүүлэхэд гоё байсан.
-Самбуунямын оролцсон хамгийн том наадам гэвэл?
-Баян-Өлгий аймагт болсон баруун бүсийн даншиг, мөн Хөвсгөл аймгийн “Хотгойдын хурд”, Завхан аймгийн 90 жилийн ой, 2009 оны “Очирваанийн хурд” уралдаанууд байна даа. Бүсийн наадмуудад миний унасан морьд дээд тал нь 20 гаргаж давхиж байсан. Улсын бүсийн наадам хүлэг, хүүхэд, уяач гурвын эрдмийг нь шалгадаг гэж боддог.

"Тод магнай" сэтгүүл Дорноговь аймгийн тусгай дугаар