Сайхан сэтгэлээс ундарсан сайн үг ерөөл болдог

Францын агуу удирдагч Напеолон Бонапартыг өсгөсөн эмээ нь өглөө бүр “Францын ирээдүйн агуу их удирдагч босоорой” хэмээн сэрээдэг байж. Хожмоо тэрхүү үг биеллээ олж, их удирдагч “эмээ маань л намайг удирдагч болгон хүмүүжүүлсэн” хэмээсэн нь бий. Түүн лугаа адил Боржигоны нэр уяач Гэлэгравданг ээж Чүлтэмгомбо нь бага балчраас нь эхлээд “миний хүү их буян эдлэх хүн” хэмээн ашдын ерөөл өргөдөг байсан гэдэг. Тухайн үед тэднийх мал хуй гэж юмгүй, хөрөнгө чинээ ч багатай ядруухан айл байсан ч хожмоо хүү нь сайн ханьтай таарч, сайн адуу цуглуулан бэлтэй нэгний тоонд орох болжээ.
Хүүдээ сайныг хүсч ерөөл өргөдөг Чүлтэмгомбо бүсгүй номын мөр хөөлгөхөөр хийдэд шавилуулсан ч цөвүүн цагийн дуулианаар хөдөө гарахаас аргагүйд хүрч. Нэгэнт хар болсон моринд дуртай хүүдээ нутгийн нэг хүнээс хүрэн морь авч өгч. Хүү нь түүнийг нь уяад нэг жилийн наадамд өөрөө барилдаж түрүүлэн, хүрэн морио уралдуулж түрүүлгээд ээжийнхээ магнайг тэнийлгэжээ. Тэр цагаас хойш Гэлэгравдан уяач олон газраас удам сайт адуу цуглуулсан бөгөөд түүний нэг нь хурдан морьт Өлзийлутаас авсан хээр гүү юм. Тэрхүү хээр гүү есөн эр унага гаргасан нь Лутын хээр, Гэлэгравдангийн зээрд зэрэг хурдан азарганууд болсон юм. Мөн нутгийн буурал Сугар хэмээх уяачийн зөвлөснөөр Төв аймгийн хорихын адуунаас шарга азарга авч  олонтаа түрүүлгэж айрагдуулсаны сацуу үр төлөөр нь ч гэсэн сайхан наадаж байжээ.
Гэлэгравдан уяачийн анхны эхнэр нутаг орондоо нэр хүндтэй хөрөнгө чинээтэй айлын охин байсан бөгөөд нэлээд хожуу Хэнтий аймгийн Дархан сумын нэгэн эмэгтэйтэй ханилж байсан гэх юм билээ
"Тод магнай" сэтгүүл Говьсүмбэр аймгийн тусгай дугаар