Говьсүмбэр аймгийн Улсын шилдэг уралдаанч Н.Цэлмэг: Ангийнхан маань надад баяр хүргэдэг

Улс, бүсийн уралдаанаас хоёр түрүү, нэг айраг, аймаг сумдын уралдаанаас 13 түрүү 15 айраг хүртсэн амжилтаар 2015 оны улсын шилдэг уралдаанчаар шалгарсан Говь-Сүмбэр аймгийн Шивээговь сумын 3-р сургуулийн 2-р ангийн сурагч найман настай Нямхүүгийн Цэлмэг хүүгийн баярын сэтгэгдлийг хуваалцлаа.
-Бяцхан шилдэг уралдаанчид баяр хүргэе. Баярынхаа сэтгэгдлээс хуваалцаач?
-Баярлалаа. Би олон газрын наадамд унасан морио түрүүлгэсэн болохоор улсын шилдэг уралдаанч болсон байх. 
-Тэр мэдээж. 2015 онд хаа хаана уралдсан юм бэ?
-Хотын нэг наадамд шүдлэн унаад айрагдуулж чадаагүй. Харин Дорноговьд болсон уралдаанд шүдлэн унаж түрүүлгэсэн. Өндөршилд бас шүдлэнгээ түрүүлгэсэн. Бусдыг нь санахгүй байнаа.
-Хэдэн настай билээ?
-Найман настай. Дөрвөн настайдаа морь унаж сурсан. Өвөө, аав хоёрынхоо морийг унадаг. Энэ жил аавынхаа бор шүдлэнг, өвөөгийнхөө Толинг унаж уралдсан. 
-Танай ангид хурдан морь унадаг хүүхэд олон уу?
-Хоёр хүүхэд байгаа. Намайг морь түрүүлгэснийг мэдээд манай ангийнхан баяр хүргэдэг юм. 
-Ангийнхаа хүүхдүүдтэй туршлагаасаа хуваалдцаг уу?
-Юу гэж хэлэх вэ дээ. Өөрсдөө л морь унаад сурна биз./инээв/
-Дараа дараагийн уралдаануудад нь амжилт хүсье.
-Баярлалаа.
Б.Эрдэнэсүрэн