ХАЛЗАН АЗАРГУУДААР ОДТОЙ НААДАГЧ ГЭЛЭГБАЛДАНГИЙН АВХҮҮ

Боржигон сэцэн вангийн хошуу нутгаар овоглодог босоо хийморьтой эрчүүдийн нэг нь Гэлэгбалдангийн Авхүү агсан юм. 1941 оны могой жилд Дорноговь аймгийн Даланжаргалан сумын нутаг Оргил хэмээх газар айлын хоёр дахь хүүхэд болон мэндэлсэн тэрээр 1965 оноос аавыгаа даган морь уяж, “Туяа” нэгдлийн 20 жилийн ойн баяр наадамд шарга шүдлэн түрүүлгэн амжилтын гараагаа эхэлж байжээ.  Түүний дараа жил шарга үрээгээ сумынхаа наадамд айргийн гуравт хурдлуулаад давхар уяагаар Хэнтий аймгийн Дархан сумын наадамд түрүүлгэсэн байна. Ийнхүү уяа эвлүүлсэн цагаас айраг, түрүү алдаагүй Г.Авхүү залгуулан хоёр халзан азаргаараа одтой сайхан наадсан байдаг.
Их халзан азарга: /Дааган цагаасаа эхлэн уягдаж/
1983 онд хязаалан үрээ аман хүзүү
1984 онд соёолон аман хүзүү
1985 онд айргийн тав /аймгийн наадамд/
1987 онд аман хүзүү /аймгийн наадамд/
1988 онд айргийн дөрөв /Хэнтийн Бор-Өндөр сумын наадамд/
1990 онд айргийн тав /аймгийн наадамд/
1994 онд айргийн тав /Дундговь аймгийн Цагаандэлгэр сумын наадамд/
1995 онд түрүү /аймгийн наадамд/
1997 онд айргийн гурав /аймгийн наадамд/
Анхны Боржигон наадамд зургаа
Бага халзан азарга:
1998 онд соёолон сумын наадамд түрүү
1999 онд хавчиг азарга сумын наадамд айргийн гурав
2000 онд Хэнтийн Бор-Өндөр суманд болсон уралдаанд түрүү
/Үүнээс хойш аймаг, сумын наадамд хэд хэд түрүүлсэн/
Г.Авхүү уяачийн хувьд 1995 он од хийморьтой сайхан жил байсан бөгөөд тэр жил аймгийн наадамд Их халзан азаргаа түрүүлгэж, төл халзан даагыг нь айрагдуулж, цагаан соёолон, сартай зээрд хязаалан тус тус түрүүлгэж байжээ. Түүнчлэн тэр жил айрагдсан төл халзан азарга 2002 онд  Дундговь аймгийн Баянжаргалан сумын наадамд түрүүлж байжээ.
Ийнхүү гурван халзан азаргаар урамтай сайхан наадаж явсан буурал Алдарт уяач 2004 онд бурхны хүлгүүдийн уяаг тааруулахаар одсон билээ.
"Тод магнай" сэтгүүл Говьсүмбэр аймгийн тусгай дугаар