Хөвсгөл аймгийн Улсын шилдэг уралдаанч Ц.Мягмардорж: Монгол хүн болсны хэрэг морь унах

Хөвсгөл аймгийн Улсын шилдэг уралдаанчаар шалгарсан Цэрэндоржийн Мягмардорж хүүгийн баярын сэтгэгдлийг уншигч танаа хүргэе.
-Хоймор нутгийн шилдэг уралдаанч хүүд баяр хүргэе.
-За баярлалаа. 2015 оны хавар Тосонд /Тосонцэнгэл суманд/ болсон уралдаанд даага түрүүлгэж, хязаалан аман хүзүүдүүлсэн. Тэрний дараа Тариаланд болсон уралдаанд хязаалан түрүүлгэж, даага гурваар давхиулсан. Уг нь шүдлэн яг айрагдах байсан ч гурав дээр явж байгаад хадуурчихсан. 
-Татаад дийлээгүй юу?
-Тиймээ.Тэрний дараа ахиад Тариаланд болсон уралдаанд хязаалан гурвалуулж, даага түрүүлгэсэн. 
-Өнгөрсөн жилийн хамгийн том уралдаан аль нь байсан бэ?
-Улсын наадамд хонгор азаргаа зургаагаар, хязаалангаа наймаар давхиулж, их насаа татуулсан. Наадмын дараа Булганд очиж бас уралдаад дараа нь уяачдын холбооны 20 жилийн ойгоор хязаалангаа түрүүлгэсэн.
-Ингэхэд хэзээнээс эхлээд хурдан морь унаж байгаа билээ?
-2011 онд морь унаж сураад, хоёр жил бэлтгэл хийж байгаад 2013 оноос уралдааны морь унаж байна. Манай ээж манай боссын компанид ажилладаг юм. Тэгээд л эдний морийг унадаг. 
-Чи морь унахдаа дуртай юу?
-Дуртай байлгүй яахав. Дээл хувцсаа өмсөөд, морь унах чинь сайхан ш дээ. Монгол хүн болсны хэрэг тэр.
-Том болоод ямар мэргэжилтэй болъё гэж боддог вэ?
-Уяач. Би хоёр гүүтэй. Ирэх хавар унагална. Эр унага гарвал уяна даа. 
-Мундаг уяач болоорой. Дүүдээ амжилт хүсье.
-Баярлалаа. Сар шинэдээ сайхан шинэлээрэй.
Б.Эрдэнэсүрэн