Ц.Отгонбат: Аймгийн удирдлагууд өөрсдөө морь дагадаггүй нь бусдад үлгэр болдог

АХ-94 жилийн ой, Өмнөговь аймаг байгуулагдсаны 84 жилийн ой "Говьшанх-5" уралдааны дэг журмын талаар Өмнөговь аймгийн цагдаагийн хэлтсийн дарга, хурандаа Ц.Отгонбатаас тодруулга авлаа.
-“Говьшанхын хурд-5” говийн бүсийн уралдааны  дэг журмыг хариуцаж ажилласан танай хамт олонд талархал илэрхийлье. 
-Баярлалаа. Засгийн газрын тогтоолт бүсийн уралдаан болж байгаа аймгууд  төвөөсөө юм уу, ойр зэргэлдээ аймгуудаасаа нэмэлт хүч авч дэг журмыг сахиулдаг. Харин манай аймгийн хувьд дангаараа наадмын зохион байгуулалт, дэг журмыг хариуцдаг уламжлалтай. Энэ удаагийн уралдаанд  20 орчим машин техник, 100 орчим хүний бүрэлдэхүүнтэй баг ажиллаа. Ер нь бол Өмнөговь аймгийн морин уралдаан харьцангуй зохион байгуулалт сайтай болдог. Морь дагах зөвшөөрлийг цөөн хэдхэн машинд л олгодог. Манай аймгийн удирдлагууд  аль нь ч морь дагадаггүй нь бусад зочид төлөөлөгчдөд үлгэр жишээ болдог юм.
-Ивээн тэтгэгч, зочдодоо ч гэсэн морь дагахыг зөвшөөрдөггүй юмуу?
-Тиймээ. Зочид төлөөлөгчдөдөө хүндэтгэлтэй ханддаг ч наадам бол нийт ард түмний баяр цэнгэл шүү дээ. Тэр утгаараа нийтийн эрх ашгийг илүүд үздэг. Хэн нэгэн нь давуу эрхтэйгээр морь дагаж будлиантуулбал наадам ард түмний баяр цэнгэл гэдэг утгаа алдана. Тэр утгаараа аймгийн  Засаг дарга, удирдлагууд өөрсдөө морь дагадаггүй. Зэвсэгт хүчний 167, хилийн цэргийн 131 ангийн захирагч нар зохион байгуулах үйл ажиллагаанд оролцож, комиссыг цэргийн штабын дарга ахалдаг. Би ажил хэрэг, амин хувийн байдлаар өөр аймгуудын наадмыг бишгүй үзсэн л дээ. Ний нуугүй хэлэхэд эмх замбараа талдаа болдог.  Түүний гол шалтгаан нь уяачид суулгасан олон машин морь дагаж будилаантуулдаг явдал юм.
-Үнэхээр ч тэр олон машин эмх замбараагүй байдал үүсгэдэг шүү?
- Энэ жил “Говьшанхын хурд” уралдааныхаа үеэр нэг ч уяачийг дагуулаагүй.
-Аймгийн статустай бүхий л уралдаанд танай хамт олон нийгмийн хэв журмыг сахин оролцдог уу?
-Тэгэлгүй яахав. Орон нутагт харуул хамгаалтыг цагдаагийн байгууллага хариуцдаг. Өөр хамгаалалтанд оролцдог ямар ч байгууллага байхгүй. Зөвхөн морин уралдааны үеийн эмх журам харуул хамгаалалт бус нийтийг хамарсан бүхий л үзвэр үйлчилгээний  үеэр манай хамт олон ажилладаг.
-Ярилцсанд баярлалаа. Танай хамт олны цаашдын ажил үйлст амжилт хүсье.