Сайхан хээрийн эзэн Санжаадоржийн Тойруул агсны тухайд...

Увс нутгаас ирж суурьшсан уяачид Говьсүмбэр аймагт олон бий. Тэдний нэг нь Увс аймгийн Өндөрхангай сумын уугуул, Сүмбэр сумын харьяат Санжаадоржийн Тойруул агсан юм. 1947 онд  төрж, 1963-1967 онд  “Бод” бригад, Өндөр-Хангай сумын өртөөний адууг малладаг байсан тэрээр 1984 онд Сүмбэр сумнаа шилжин иржээ. Улмаар нэгдэл нийгмийн ажлыг завчлан морь уях төрийн хэрэгт шимтэж, сум, аймгийн чанартай наадмаас олон айраг, түрүү хүртэн 2003 онд сумын, 2005 онд аймгийн Алдарт уяач цолны эзэн болж байсан байна. Уясан хүлгээ түрүүлгэж айрагдуулчихаад угалзат асрын өмнө цоллуулж зогссон бахдалт он жилүүдээс түүний хувьд хамгийн нандин нь 2003 оны төвийн бүсийн уралдаан. Их уяач Доноодойн Галын нэрэмжит “Боржигон - 2003” төвийн бүсийн уралдаанд С.Тойруул уяач хээр морио айргийн таваар хурдлуулан  дээлэндээ багтахгүй хөөрч явснаа дурсах дуртай байж. Арга ч үгүй биз. Газар газрын хурд чуулсан тэрхүү уралдаанд хурдан хээр нь Д.Ононгийн Аварга хээрийн урд гишгэн айраг амсуулсан юм. Ийнхүү уясан эзний магнайг тэнийлгэж, унасан хүүхдийг урмаар тэтгэсэн хурдан хээрийн эх тал нь Өндөршил, харин эцэг нь Хэнтий зүгийн адуу байсан гэдэг. Дараа жил нь хээр морь Дундговь аймгийн Говь-Угтаал сумын 80 жилийн ойд айргийн гуравт хурдлан амжилтаа бататгаж байсан аж.

"Тод магнай" сэтгүүл Говьсүмбэр аймгийн тусгай дугаар