“Цэцэн хурд” МСУХ-ны тэргүүн Г.Батаа: Сумынхаа хурдан морьдын амжилтын цувааг хөтөлж, архив бүрдүүлнэ

Завхан аймгийн Цэцэн-Уул сумын уугуул, “Цэцэн хурд” МСУХ-ны тэргүүн Г.Батаатай хийсэн ярилцлагыг уншигч танаа хүргэж байна.
-“Цэцэн хурд” МСУХ-ны  танилцуулгаар ярилцлагаа эхэлье?
-“Цэцэн хурд” МСУХ 1995 онд үүсгэн байгуулагдаж, анхны тэргүүнээр нь С.Ганболд, хоёр дахь тэргүүнээр Ломбо, гурав дахь тэргүүнээр Батдорж нар ажиллаж байгаад миний бие дөрөв дэх тэргүүн нь болж хоёр сарын өмнө энэ албыг хүлээж авсан. Түүнээс өмнө би нарийн бичгийн даргаар нь ажиллаж байсан юм. Тэргүүний албаа аваад  “Тэсийн голын хурд-2” уралдааныг амжилттай зохион байгууллаа. Энэ удаагийн уралдаанд таван сумын уяачид хурдан хүлгэдийнхээ хамт ирж оролцон, өтгөн сайхан наадам боллоо. Манай сумаас хоёр  даага, нэг шүдлэн гурван айраг авлаа.
-Бүсийн чанартай уралдааныг анх удаа зохион байгуулахад хүндрэлтэй зүйл юу байв?
-Хөрөнгө, санхүүгийн асуудлууд л жаахан хүнд байлаа даа. Гэхдээ бид хандив, уяачдынхаа татвар, бүртгэлийн хураамж зэргээр шагналаа сангаа бүрдүүлсэн. Уяачийн бүтэн жилийн хөдөлмөр шингэсэн байдаг болохоор бидний зүгээс ямар нэг будилаангүй сайн зохион байгуулахыг хичээж,түүндээ ч хүрч чадлаа.
-МСУХ-ны тэргүүний ажлыг аваад удаагүй ч өмнө нь нарийн бичгийн даргаар ажиллаж байсан хүн. Юу хийж хэрэгжүүлэв, цаашид ер нь юу хийхээр төлөвлөж байгаа вэ?
 -Манай суманд морь тавих ажил хүндрэлтэй л дээ. Тийм болохоор тэргүүний ажлаа аваад гарааны төхөөрөмжтэй болъё гэсэн зорилт тавьж, түүндээ ч хүрлээ. Манай холбооны тэргүүлэгч Цэвэгжав, уяач Бямбаа болон найз Энхмаа нартайгаа хамтран гарааны төхөөрөмж хийсэн.
-Сумын  хэмжээнд цол хэргэмтэй уяач хэр олон  байна?
-Аймгийн Алдарт уяач 17, сумын Алдарт уяач 32 хүн бий. Уяачдаа холбооныхоо үйл ажиллагаанд идэвхтэй оролцуулах тодорхой хэмжээний үүрэг хариуцлага хүлээлгэх үүднээс татвараа төлөөгүй уяачдын алдар цолны тодорхойлолтыг хүлээж авахгүй байхаар тогтсон. Өнөөдрийн хувьд санхүүгээ хандив, тэргүүлэгч гишүүдийн татвараар л бүрдүүлж байна.
-Хичнээн тэргүүлэгч гишүүнтэй вэ?
-Манайх 15 тэргүүлэгч гишүүнтэй. Жилийн хураамж нь 100 мянган төгрөг байдаг. Аймгийн Алдарт уяачид 50 мянга, сумын Алдарт уяачид 30 мянга, морь сонирхогч жирийн уяачид доод тал нь 20 мянган төгрөгийн татвар төлж байхаар журам тогтоогоод байгаа.
-“Цэцэн хурд” МСУХ-ны тэргүүний цаашдын төлөвлөгөөг сонсож болох уу?
-Сумын  морин спортын түүхийг өгүүлэх амжилтын цувааг нэг бүрчлэн хөтөлж, архивтай болохоор төлөвлөж байна. Энэ нь хамгийн наад зах нь уяачдаа алдар цолонд тодорхойлоход баримт болохоос эхлээд ач холбогдол ихтэй. Түүнчлэн нутгийн адуугаа чанаржуулж, Хүнгийн голын хурд буюу цагаанууд адуугаа сэргээх бодолтой байна.
-“Цэцэн хурд”-ын тэргүүн уяачийнхаа хувьд ямар амжилт үзүүлээд байгаа вэ. Ер нь хэзээнээс эхлэн хүлгийн хурд ирлэх болсон бэ?
-Би удам дамжсан уяач. Миний аав Галаарай аймгийн Алдарт уяач цолтой. Би өөрөө сумын Алдарт уяач. Хадам аав маань ч гэсэн морь уядаг. Энэ сумын анхны Алдарт уяач цолтон.

"Тод магнай" сэтгүүл №54