Аймгийн Алдарт уяач Г.Гантулга: Хээр даага маань бүсийн наадмын анхны түрүүг авчирлаа

Хангайн бүсийн уралдаанд хээр даагаа түрүүлгэсэн Хутаг-Өндөр сумын харьяат, аймгийн Алдарт уяач Гаравсүрэнгийн Гантулгаас баярын сэтгэгдлийг нь хуваалцлаа. Морин жилдээ одтой сайхан наадан, аймгийнхаа шилдэг уяачаар шалгарсан хийморилог залуу ийнхүү Засгийн газрын тогтоолт бүсийн наадмын түрүү хүртэн амжилтын буухиагаа үргэлжлүүлжээ.
-Өнгөрсөн жил уулзахад сумын Алдарт уяач цолтой байсан санагдана?
-Тиймээ. Манай Хутаг-Өндөр сумын уяачдын төлөөлөл өмнө нь “Тод магнай” сэтгүүлд оролцоход би сумын Алдарт уяач цолтой байсан. Ноднин аймгийн чанартай бүсийн уралдаанаас хоёр түрүү, дөрвөн айраг, сумын чанартай наадмаас 19 айраг, түрүү хүртсэн амжилтаараа аймгийн шилдэг уяачаар шалгаран сар шинийн өмнөхөн аймгийн Алдарт уяач болсон юм. Өнөө жил ч гэсэн тэрхүү амжилтаа баталж 20 гаруй айраг, түрүү хүртлээ. Үүнээс өмнө 2011 онд сумын Алдарт уяач цолыг  хүртэхдээ мөн сумын шилдэг уяачаар шалгарч байсан.
-Залуу уяачийн хийморь өөдөө байгаа бололтой. Цолоо бүсийн уралдаанаар түрүүгээр мялаасан нь бэлгэшээлтэй сайхан санагдсан байх? 
-Тэгэлгүй яахав. Сая хангайн бүсийн уралдаанд хээр даага маань түрүүлж, том наадмын анхны түрүүг авчирлаа. Өмнө нь аймгийн чанартай бүсийн наадамд л морь түрүүлгэж, айрагдуулж байсан.
-Бүсийн наадамдаа хэдэн насны морь мордуулсан бэ? Баяр наадмын талаарх сэтгэгдлээсээ хуваалцаач?
-Хангайн бүсийн уралдаан сайхан болсоон. Булган аймгийн морин спорт уяачдын холбоо маань маш сайн зохион байгуулж ямар нэгэн будилаан, маргаангүй есөн насны морио уралдуулж чадсаныг зориуд хэлмээр байна. Би даага, шүдлэн хоёртой очин дааага түрүүлгэн, шүдлэнгээ 30 гаргаж давхиуллаа. Шүдлэн үрээ маань аймгийнхаа баяр наадамд дөрөвт давхисан адуу л даа.
-Төрийн зарлигт наадмын түрүү  авчирсан хээр  дааганыхаа талаар танилцуулаач?
-Манай хүргэн ах Оросоогийн Мэндбаярын унаган адуу. Он гарсаар долоо уралдаж тав түрүүлээд байгаа юм. Сайхан суманд болсон хаврын бүсийн уралдаанд наймд давхиад, улсын наадамд очиж 16-д ирсэн. Сумынхаа наадамд хол түрүүлэхээр нь аймагт уралдуулалгүй шууд улсын наадмыг зорьсон юм. Анх удаа улсын наадамд очиж байгаа болохоор туршлага дутсан тал бий байх. Дээр нь энэ жил их гандуу байсан шүү дээ. Гэсэн хэдий ч хээр үрээ маань сайхан давхиад 16-д ирсээн.
-Өнгөрсөн жилийн шилдэг уяач 2015 он гарсаар хэрхэн наадсан бэ?
-Хамгийн том нь мэдээж хангайн бүсийн уралдааны түрүү. За тэгээд аймгийнхаа баяр наадамд шүдлэн айрагдуулж, Хутаг-Өндөр сумынхаа баяраас хоёр түрүү, гурван айраг хүртсэн. Мөн хаврын бүсийн уралдаанаас хоёр түрүү авсан даа.
-Хангайн бүсийн уралдаанд амжилт гаргасан уяачид ММСУХ-ны 20 жилийн ой болон Даншиг наадамд ирж оролцсон байна лээ. Таны хувьд?
-Би яваагүй ээ. Бүсийн наадмын дараа  даагаа тавьсан. Сөнгө даага байгаа юм.
-Хийморилог уяачийн амжилтын буухиа үргэлжилж, төрийн хишиг хүртэх болтугай. Ярилцсанд баярлалаа.
-Ерөөлөөр болог.
"Булганхангайн хурд" сэтгүүл №01